ठाण्यात दिवसभर पावसाची संततधार सुरूच
सकाळ वृत्तसेवा
ठाणे : ठाणे शहरात सकाळपासून पावसाची संततधार दिवसभर सुरू होती. या दिवसभरात नौपाड्यातील पंपिंग स्थानकाची संरक्षक भिंत पडली असून, त्या घटनेव्यतिरिक्त अन्य कोणतीही घटना ठाण्यात घडलेली नाही, तर एकीकडे हवामान खात्याने ठाण्यात मुसळधार पावसाची शक्यता वर्तवली होती. तसेच सतर्क राहावे असे आवाहन नागरिकांना केले होते. त्यादृष्टीने पाऊस झाला नसला तरी, शनिवारी सकाळी साडेआठ वाजल्यापासून सायंकाळी साडेसात वाजेपर्यंत म्हणजे अकरा तासांत अवघा १९.०१ मिमी पाऊस नोंदवला गेला आहे. तसेच त्यानंतर ही पावसाची संततधार सुरूच होती. याशिवाय, गेल्या चोवीस तासांत ठाणे शहरात ७०.८१ मिमी पावसाची नोंद झाल्याची माहिती ठाणे महापालिका आपत्ती व्यवस्थापन कक्षाने दिली.