खाडी प्रदूषणावर प्रशासनाचे लक्ष
पीओपी मूर्ती विसर्जन करणाऱ्यांवर कारवाईचे आदेश

ठाणे शहर ता. १७ (बातमीदार) : गणेशोत्सवाच्या काळात कृत्रिम तलावांमध्ये विसर्जित केलेल्या पीओपी मूर्तींचे नंतर खाडीत पुनर्विसर्जन करून पर्यावरणाची मोठ्या प्रमाणावर हानी केली जात आहे. तसेच खाडीत मूर्तींचे विसर्जन करताना प्रदूषणाचे नियम पाळले जात नसल्याची तक्रार पर्यावरण अभ्यासकांनी केली. त्यामुळे या प्रकाराला आळा घालण्यासाठी मुख्यमंत्री आणि नगरविकास विभागाने ठाणे महापालिकेला कठोर कारवाईचे निर्देश दिले आहेत.

ठाणे शहरात पर्यावरणपूरक गणेशोत्सव साजरा व्हावा. यासाठी ठाणे महापालिकेकडून मूर्ती विसर्जनासाठी कृत्रिम तलाव तयार केले आहेत. या प्रकारचे काम अनेक वर्षांपासून केले जात आहे, परंतु अनेकदा कृत्रिम तलावांतील प्लास्टर ऑफ पॅरिसच्या मूर्त्या (पीओपी) विसर्जनाच्या दुसऱ्या, तिसऱ्या दिवशी खाडीत विसर्जित केल्या जातात. पालिकेकडून असे केले जाऊ नये, कृत्रिम तलावात विसर्जित केलेल्या मूर्त्यांची योग्य प्रकारे विल्हेवाट लावावी, अशा मागणीचे निवेदन पर्यावरण अभ्यासक डॉ. प्रशांत सिनकर यांनी मुख्यमंत्री देवेंद्र फडणवीस आणि पर्यावरणमंत्री पंकजा मुंडे यांना केले होते. त्या निवेदनाची दखल मुख्यमंत्री आणि नगरविकास कार्यालयाने घेत याबाबत ठाणे महापालिकेला निर्देश दिले असून, केलेल्या कारवाईची माहिती कळवली जाईल, असे नगरविकास विभागाचे कक्ष अधिकारी अनिरुद्ध गोसावी यांनी कळवले आहे. प्रशासनाच्या या निर्णयामुळे पर्यावरणप्रेमी आणि खाडीमध्ये मासेमारी करणाऱ्या कोळीबांधवांना दिलासा मिळणार आहे.

खाडी आणि पर्यावरण बचावाचा मुद्दा
ठाणे शहरात पर्यावरणपूरक गणेशोत्सवासाठी कृत्रिम तलावांची व्यवस्था असूनही काही वेळा त्या तलावांतील मूर्ती दुसऱ्या-तिसऱ्या दिवशी पुन्हा खाडीत टाकल्या जातात. यामुळे पाण्यातील जैवविविधतेला धोका पोहोचतो, मासळीचे उत्पादन घटते आणि स्थानिक कोळी समाजाच्या उपजीविकेवर परिणाम होतो. सिनकर यांच्या मते, ‘‘प्रशासनाने ही गंभीर बाब लक्षात घेत निर्णय घेतल्यामुळे कोळीबांधव आणि पर्यावरणप्रेमी यांना दिलासा मिळणार आहे.’’