वडिलोपार्जित शेतीच खरी दौलत : प्रांताधिकारी खुटवड
रोहा, ता. १७ (बातमीदार) : वडिलोपार्जित शेती हीच खरी दौलत आहे. ती विकू नका, नाहीतर पुढची पिढी आपल्याला कधीही माफ करणार नाही, असे प्रतिपादन रोहा प्रांताधिकारी ज्ञानेश्वर खुटवड यांनी केले. गोपाळवट येथील प्रगतशील शेतकरी भाऊ डिके यांचा शेताच्या बांधावर सन्मान करताना ते बोलत होते.
गावाच्या नैसर्गिक सौंदर्याची आणि शेतकऱ्यांच्या कष्टाची दखल घेत खुटवड म्हणाले, की जमिनीचा पोत सुधारला पाहिजे. कृतीशील शेतकऱ्यांचा आदर्श घ्यावा. डिके यांचा सन्मान हा माझ्या वडिलांच्या कष्टांचा सन्मान असल्यासारखा वाटतो. कार्यक्रमात कुडली येथील महिला आदर्श शेतकरी संज्योत पडवळ यांचाही शाल, श्रीफळ आणि सन्मानचिन्ह देऊन गौरव करण्यात आला. या वेळी कृषी विज्ञान केंद्राचे प्रमुख डॉ. मनोज तलाठी यांनी मार्गदर्शन करताना सांगितले, की शेतकऱ्यांनी कृषी पर्यटनाकडे वळले तर ग्रामीण भागात रोजगारनिर्मितीचे नवे मार्ग खुले होतील. चुलीवरचे जेवण, कोरी चहा, ग्रामीण खेळ, कलात्मक उपक्रम तसेच मासळीचे पदार्थ यामुळे पर्यटनाला मोठी चालना मिळेल, असे ते म्हणाले. या सोहळ्यास तालुका कृषी अधिकारी महादेव करे, सिटीझन फोरमचे अध्यक्ष आप्पा देशमुख, शेतकरी प्रतिष्ठानचे अध्यक्ष गणेश भगत, संघटक शशिकांत मोरे, दीपक फाउंडेशनचे अनिकेत निकम, बिजामृतचे चेअरमन भारत पाटील, शेतकरी चंद्रकांत लोखंडे, बापूसाहेब पडवळ, डॉ. चव्हाण, ग्रामसेविका पूजा रंगारी यांच्यासह विविध कृषी संस्थांचे पदाधिकारी उपस्थित होते.