दुचाकीस्वार अपघातात गंभीर जखमी
कोनगाव पोलिसांत गुन्हा दाखल
भिवंडी, ता. १७ (बातमीदार) : भरधाव वेगाने व निष्काळजीने वाहन चालवणाऱ्या एका पिकअप व्हॅनचालकाने दुचाकीस्वाराला जोरदार धडक दिली. या अपघातात दुचाकीस्वार गंभीर जखमी झाला असून, धडक दिल्यानंतर व्हॅनचालक घटनास्थळावरून पळून गेला. कोनगाव पोलिस ठाण्यात याप्रकरणी गुन्हा दाखल करण्यात आला आहे.
गिरीश विजय भोईर (३९, रा. ठाणे) हे त्यांच्या दुचाकी (एमएच-०४/एलजे-४९४९)वरून नाशिककडे जात असताना पिंपळास येथील भूमी वर्ल्डजवळ मागून आलेल्या चारचाकीने (एमएच-०४/केयू-३३०२) त्यांच्या दुचाकीला जोरदार धडक दिली. या धडकेमुळे भोईर रस्त्यावर कोसळले आणि त्यांच्या कंबरेला व डाव्या पायाला गंभीर दुखापत झाली. त्यांना तातडीने रुग्णालयात दाखल करण्यात आले असून, कंबरेवर शस्त्रक्रिया करण्यात आली आहे. दरम्यान, अपघातानंतर आरोपी चालक बशीर जैनुद्दीन अन्सारी (२७, रा. नेहरू नगर, नवीवस्ती, भिवंडी) घटनास्थळावरून फरार झाला.