दहीहंडी उत्सवात शिवसेना-मनसे एकत्र
जुईनगर, ता. १७ (बातमीदार) : शहरातील दहीहंडी उत्सवाला शनिवारी (ता. १६) राजकारणाची झालर पाहायला मिळाली. नवी मुंबईत ठाकरे गट आणि मनसेतर्फे आयोजित दहीहंड्यांच्या व्यसपीठावर दोन्ही पक्षाचे पदाधिकारी एकत्र आल्याचे पाहायला मिळाले. शिवसेना जिल्हाप्रमुख प्रकाश पाटील यांनी वाशीतील मनसे आयोजित हंडीला हजेरी लावली. तर सानपाडा, जुईनगर, नेरूळ येथील शिवसेना आयोजित दहीहंडीत मनसे पदाधिकारी दिसून आले.
सानपाडा, जुईनगर, नेरूळ आणि बेलापूर या ठिकाणी ठाकरे गटाच्या निष्ठा दहीहंड्यांचे आयोजन केले गेले होते. दहीहंडीला निष्ठा हंडी हा शिंदे गटात गेलेल्या शिवसैनिकांना उपरोधिक टोला असल्याची चर्चा आहे. या दहीहंड्यांना मोठ्या प्रमाणात गर्दी उसळली होती.
भाजप आणि काँग्रेसमधून दाखल झालेल्या राजेश भोर, नवनाथ चव्हाण यांनी पहिल्यांदाच ठाकरे गटातर्फे शिवाजी महाडिक यांच्या मार्गदर्शनाखाली हंडीचे आयोजन केले होते. सानपाडा सेक्टर तीन येथे शाखा क्रमांक ७४ तर्फे संजय गव्हाणे व अजय पवार यांनी निष्ठा हंडीचे आयोजन केले होते. जुईनगर येथील गणेश मैदानात माजी नगरसेवक विशाल ससाणे यांनी नशामुक्त नवी मुंबईची जनजागृती करणारे फलक लावून दहीहंडी आयोजित केली. तर एकूण २२ पथकांनी हजेरी लावत बालगोपाळ पथकाने ही हंडी फोडली. बेलापूर येथील उपजिल्हाप्रमुख संदीप पाटील यांनी निष्ठा हंडीचे आयोजन केले होते. तर वाशी येथे अभिलेश दंडवते यांनी मनसेतर्फे आयोजित दहीहंडीत अनेक शिवसेना पदाधिकारी एकदिलाने सहभागी होताना दिसले.