जखमी तरुणाचा
२१ दिवसांनंतर मृत्यू

कल्याण-शीळ रस्त्यावरील खड्ड्यांचा बळी

सकाळ वृत्तसेवा
डोंबिवली, ता. १७ : कल्याण-शीळ रस्त्यावरील खड्ड्यामुळे अपघातात जखमी झालेल्या कल्याणच्या २८ वर्षीय तरुणाचा २१ दिवसांनी मृत्यू झाला आहे. रोहन शिंगरे असे या तरुणाचे नाव असून रामबाग परिसरात तो राहत होता. ज्येष्ठ शिवसैनिक राजेंद्र शिंगरे यांचा ताे एकुलता एक मुलगा होता.

राेहन २३ जुलैला कामावर जात असताना हा अपघात झाला हाेता. राेहन याच्या मृत्यूने कल्याण परिसरावर शोककळा पसरली आहे. रोहन हा वाशी येथे कामाला होता. २३ जुलैला दुचाकीवरून ताे सकाळी कामावर चालला हाेता. पिंपळेश्वर हॉटेलजवळ खड्ड्यामुळे तोल गेल्याने खाली पडला. त्या वेळी मागून येणाऱ्या ट्रकच्या चाकात त्याचा हात अडकला. ट्रकने त्याला काही अंतर फरफटत नेले. नागरिकांनी जखमी रोहनला रुग्णालयात दाखल केले. तेथून त्याला सानपाडा येथे हलवण्यात आले. हेल्मेट असल्याने डोक्याला इजा झाली नव्‍हती. त्याचा डावा हात काढून टाकण्यात आला हाेता. अखेर उपचारांदरम्यान १५ ऑगस्टला त्याचे निधन झाल्याची माहिती माजी नगरसेविका वैजयंती घोलप यांनी दिली.
----
‘सकाळ’ने अनेकदा वेधले लक्ष
डोंबिवली : कल्याण-शीळ रस्त्यावरील खड्डे, रखडलेले रुंदीकरण याकडे लक्ष वेधून ‘सकाळ’ने अनेकदा अपघाताची शक्यता व्‍यक्त केली हाेती; मात्र त्याकडे दुर्लक्ष झाले. रक्षाबंधन आणि दुसऱ्या दिवशी रविवारी कल्याण-शीळ रोडवर अभूतपूर्व वाहनकोंडी झाली हाेती. वाहने चार ते पाच तास या कोंडीत अडकली होती.

नवीन पलावा पुलावरही खड्डे
देसाई खाडी ते काटईनाका अशा नव्या पलावा उड्डाणपुलाची उभारणी करण्यात आली आहे. नुकताच हा पूल वाहतुकीसाठी खुला करण्यात आला आहे. दोनच दिवसांत या पुलावर खड्डे पडून यावरील रस्त्याची दुरवस्था झाली आहे.