हजारो दिव्यांनी उजळले कळंबूसरेतील शिवमंदिर
श्रावणी सोमवारची भक्तिमय सांगता; कीर्तन, पूजन व महाप्रसादाचा भक्तिभावाने कार्यक्रम
उरण, ता. १९ (वार्ताहर) : उरण तालुक्यातील निसर्गरम्य कळंबूसरे गावातील प्राचीन स्वयंभू कळंबेश्वर शिवमंदिर श्रावणी सोमवारच्या चौथ्या सांगता दिवशी हजारो दिव्यांच्या रोषणाईने उजळून निघाले होते. पहाटेपासूनच भाविकांची मंदिरात मोठी गर्दी उसळली होती. पहाटे पाच वाजता महादेवाचा अभिषेक व पूजनाने दिवसाची सुरुवात झाली, तर दिवसभर विविध धार्मिक विधी पार पडले.
या विशेष दिवशी ग्रामस्थांच्या वतीने कीर्तनकार ह. भ. प. संदीप महाराज यादव यांच्या कीर्तनाचे आयोजन करण्यात आले होते. त्यांच्या सुश्राव्य कीर्तनात भाविक मंत्रमुग्ध झाले. ओम नमःशिवाय या जपाच्या सुरांमध्ये भाविक तल्लीन झाले होते. कीर्तनानंतर मंदिर परिसरात आकर्षक दिव्यांची रोषणाई करण्यात आली. यामुळे मंदिर व परिसर दिवाळीप्रमाणे उजळून निघाला. कळंबूसरे हे गाव उरण पूर्व भागात निसर्गाच्या कुशीत वसलेले आहे. पूर्वेला कलम डोंगर, दक्षिणेला गर्द झाडीत असलेली शेती, पश्चिमेला हिरवीगार डोंगररांग आणि उत्तरेला टेकडीवर वसलेले गाव, असे रमणीय वातावरण मंदिराला लाभले आहे. याच शांत व निसर्गरम्य परिसरात वसलेले स्वयंभू शिवमंदिर भाविकांचे आध्यात्मिक ऊर्जेचे केंद्र मानले जाते. शिलालेखाच्या आधारे या शिवलिंगाचा इतिहास हजारो वर्षांपूर्वीचा असल्याचे सांगितले जाते. मंदिराच्या गाभाऱ्यात रुद्रावतार शिवलिंगाशेजारी कालभैरव, हनुमंताची शिळा व नंदीची मूर्ती असल्याने मंदिराचे धार्मिक महत्त्व अधिक अधोरेखित होते.
.................
श्रावणी सोमवारचे औचित्य साधून मंदिरात हरिपाठ, प्रवचन, कीर्तन, संध्याकाळची आरती आणि महाप्रसादाचे आयोजन करण्यात आले होते. अखेरच्या सोमवारी आयोजित कार्यक्रमाला हजारो भाविक उपस्थित राहिले. कीर्तनानंतर झालेली रोषणाई ही या सोहळ्याचे खास आकर्षण ठरले. प्राचीन इतिहास, शांत निसर्ग आणि भक्तिभावाचा संगम असलेल्या कळंबूसरेतील या मंदिराने श्रावणी सोमवारला भक्तिमय वातावरणाची अनुभूती दिली.