टेम्पोची ट्रकला भीषण धडक

कासा, ता. १९ (बातमीदार) : मुंबई-अहमदाबाद महामार्गावर आंबोली येथील आराम हॉटेलसमोर मंगळवारी (ता. १९) पहाटे दीड वाजण्याच्या सुमारास झालेल्या भीषण अपघातात एक टेम्पोचा चालक गंभीर जखमी झाला.
मुंबईहून गुजरातकडे जाणाऱ्या ट्रकच्या मागे सिमेंट ब्लॉक अडकल्याने चालकाने हा ट्रक दुसऱ्या मार्गिकेवर उभा केला होता; मात्र आवश्यक असा रेड रिफ्लेक्टर न लावल्यामुळे पाठीमागून येणाऱ्या टेम्पोने या उभ्या ट्रकला धडक दिली. या अपघातात टेम्पोच्या केबिनचा चक्काचूर झाला. चालक केबिनमध्ये अडकून पडला होता. त्याच्या कपाळ, गळा व छातीवर गंभीर जखमा झाल्या. या अपघाताची माहिती मिळताच पोलिसांनी घटनास्थळी धाव घेत क्रेनच्या मदतीने केबिनमध्ये अडकलेल्या चालकास बाहेर काढून तातडीने कासा उपजिल्हा रुग्णालयात उपचारासाठी दाखल केले. त्यानंतर दोन्ही अपघातांत वाहने क्रेनच्या साहाय्याने रस्त्याच्या बाजूला काढून या मार्गावरील वाहतूक सुरळीत करण्यात आली.