कंत्राटदारासोबत अभियंत्यांवर कारवाईची मागणी
पंप कार्यन्वित न केल्याने नवी मुंबईत पाणी साचले
नेरूळ, ता.२० (बातमीदार) ः दोन दिवसांपासून मुसळधार पाऊस पडल्यामुळे शहरातील विविध भागांत पाणी साचले आहे. परंतु, येथील पाणी उपसा करण्यासाठी पालिकेकडून पंप कार्यन्वित न केल्याने या भागात पाणी साचल्याचे समोर आले आहे. त्यामुळे संबंधित कंत्राटदार व अधिकाऱ्यांवर कारवाई करावी, अशी लेखी मागणी भाजप कामगार मोर्चाचे कोकण विभाग उपाध्यक्ष सुधीर पाटील यांनी पालिका आयुक्तांकडे केली आहे.
पावसाचे पाणी पंपाद्वारे काढण्याचे काम विविध कंत्राटदारांना नवी मुंबई पालिकेच्या शहर अभियंता विभागाकडून दिले आहे. मात्र, मुसळधार पावसाने कंत्राटदाराच्या कामचुकारपणाची प्रचिती नवी मुंबईकरांना आल्याचे मत पाटील यांनी व्यक्त केले आहे. नवी मुंबईच्या पाणी साचलेल्या ठिकाणी पंप कार्यान्वित केल्याचे दिसून आले नाही. त्यामुळे संबंधित अभियंत्यांकडून पालिका क्षेत्रातील बेलापूर ते दिघा विभाग कार्यालयापर्यंतच्या संबंधित प्रत्येक कामाची, कंत्राटदाराची, पाणी साचल्याच्या ठिकाणांची आणि संबंधित कंत्राटदाराकडून पाणी उपसाच्या कामाची माहिती घ्यावी. आणि त्या-त्या दिवसाचे, वेळेचे, ठिकाणाचे लेखी अहवाल, जीपीएस प्रणालीद्वारे फोटो मागवावे. यानुसार पालिकेची फसवणूक करणाऱ्या कंत्राटदार आणि संबंधित भियंत्यांवर कायदेशीर कारवाई करावी, अशी मागणी सुधीर पाटील यांनी केली आहे. यावर शहर अभियंता शिरीष आरदवाड यांनी कार्यान्वित पंपाविषयी चौकशी करून योग्य कार्यवाही केली जाईल, असे सांगितले आहे.