भिवंडी, ता. २० (वार्ताहर) : भिवंडी महापालिकेचे अधिकारी व कर्मचारी पुन्हा एकदा आंदोलनाच्या तयारीत आहेत. सहावा आणि सातवा वेतन आयोगाची थकबाकी देण्यात आली नाही, तर सोमवारी (ता. २५) पालिका मुख्यालयाच्या प्रवेशद्वारासमोर एक दिवसाचे ‘इशारा आंदोलन’ करण्यात येईल, असा इशारा महापालिका कामगार कर्मचारी संघर्ष कृती समितीने दिला आहे.
आर्थिक टंचाईचे कारण देत वेतन आयोगाची थकबाकी रोखली जात आहे. मात्र, दुसरीकडे कंत्राटदारांची बिले मंजूर केली जातात. कंत्राटदारांना निधी उपलब्ध होतो. मग कर्मचाऱ्यांचे हक्क का रोखले जातात?, असा सवाल कृती समितीने उपस्थित केला आहे. हे आंदोलन फक्त सुरुवात आहे. मागण्यांकडे दुर्लक्ष झाल्यास भविष्यात बेमुदत उपोषणासह मोठे आंदोलन उभारले जाईल. त्यांनी सर्व कर्मचाऱ्यांना काम बंद करून मोठ्या संख्येने आंदोलनात सहभागी होण्याचे आवाहन केले आहे.
कर्मचाऱ्यांच्या ‘न्याय हक्कासाठीची शेवटची लढाई’ असून ती कोणत्याही परिस्थितीत जिंकलीच पाहिजे. या आंदोलनाचा परिणाम थेट प्रशासनावर होण्याची शक्यता आहे, कारण वेतन आयोगाचा मुद्दा अनेक वर्षांपासून प्रलंबित आहेत. हजारो कर्मचाऱ्यांचे भविष्य त्यावर अवलंबून आहे. आंदोलनात म्युनिसिपल मजदूर युनियन, भारतीय कामगार महासंघ, अखिल महाराष्ट्र जनरल कामगार युनियन, रिपब्लिकन श्रमिक ब्रिगेड आणि शासकीय वाहन चालक संघटना (भिवंडी युनिट) सहभागी होणार आहेत.