उल्हासनगर, ता. २१ (बातमीदार) : भाजपने ज्या वेगाने भरारी घेतली आहे, त्यानुसार महाराष्ट्रातील प्रत्येक महापालिका हद्दीत पक्षाचे किमान २५ हजार चौरस फुटांचे कार्यालय असणे आवश्यक आहे, असे प्रतिपादन प्रदेशाध्यक्ष रवींद्र चव्हाण यांनी उल्हासनगरात केले.
शहरातील गोलमैदान परिसरातील उच्चभ्रू वसाहती व व्यवसायिक भागात भाजपचे नवनिर्मित मध्यवर्ती कार्यालय जिल्हाध्यक्ष राजेश वधारिया यांच्या संकल्पनेतून सुशोभीकरण करून तयार केले आहे. या कार्यालयाचे उद्‍घाटनासाठी चव्हाण आले होते. प्रदेशाध्यक्ष झाल्यानंतर प्रथमच उल्हासनगरात आगमन झाल्याने त्यांनी प्रमुख पदाधिकारी, माजी लोकप्रतिनिधी व कार्यकर्त्यांशी संवाद साधला. वधारिया आणि त्यांच्या टीमने उभारलेले कार्यालय उत्कृष्ट असून, आणखी भव्य आणि सुसज्ज करण्याच्या सूचना त्यांनी दिल्या. तसेच, प्रत्येक महापालिका क्षेत्रात अशाच पद्धतीने मोठ्या कार्यालयांच्या उभारणीसाठी पक्ष सज्ज असल्याचेही त्यांनी स्पष्ट केले.
याप्रसंगी भाजपचे महासचिव अमित वाधवा यांचा वाढदिवस साजरा करून रवींद्र चव्हाण यांनी त्यांना शुभेच्छा दिल्या. कार्यक्रमाला आमदार कुमार आयलानी, कल्याण पूर्वच्या आमदार सुलभा गायकवाड, युवानेते वैभव गायकवाड, जमनू पुरस्वानी, महेश सुखरामानी, मनोहर खेमचंदानी, प्रकाश माखीजा, चार्ली पारवानी, दीपक छतलानी, अमित वाधवा, अवी पंजाबी यांच्यासह भाजप पदाधिकारी व कार्यकर्ते मोठ्या संख्येने उपस्थित होते. तसेच कलानी गटातून भाजपमध्ये प्रवेश करणारे संजयसिंह (चाचा) आणि महिला आघाडीच्या कार्यकर्त्यांचीही उपस्थिती लक्षणीय होती.