घराचा भाग कोसळून वाहनांचे नुकसान
कल्याण, दि. २१ (बातमीदार) : पावसाळ्यात दरड कोसळणे, झाडे पडणे अशा अनेक घटना समोर येतात. पश्चिमेतही दूधनाका बंदर रोड परिसरात सततच्या पावसाने एका जीर्ण घराचा भाग कोसळून वाहनांचे नुकसान झाले आहे. घराखाली उभ्या असलेल्या दुचाक्यांवर घराचा मलबा तसेच लाकडी खांब कोसळला. सुदैवाने वाहनांजवळ कोणीही नसल्याने व घरात वास्तव्य नसल्याने जीवितहानी टळली. ऐतिहासिक वारसा लाभलेल्या कल्याण शहराच्या पश्चिम भागात अजूनही काही जुन्या बनावटीच्या वास्तू आहेत. आतापर्यंत काही वास्तूंची पडझड झाली असून काही धोकादायक तर काही अजूनही सुस्थितीत आहेत. पुरातन वास्तूंच्या नाशामुळे शहरातील ऐतिहासिक पाऊलखुणा पुसट होऊ लागल्या आहेत.