वज्रेश्वरी, ता. २१ (बातमीदार) : भिवंडी तालुक्यातील गणेशपुरी आणि वज्रेश्वरी परिसरात मोबाईल नेटवर्कच्या अडचणींनी नागरिक हैराण झाले आहेत. अचानक नेटवर्क जाणे, फोन सुरू असताना कट होणे, नेट अत्यंत धीम्या गतीने चालणे या समस्यांमुळे ‘टॉवर आहे नावाला, मात्र रेंज नाही गावाला’, अशी म्हण करण्याची वेळ मोबाईलधारकांवर आली आहे.

गणेशपुरी गावात जिओ कंपनीचा टॉवर काही वर्षांपूर्वी कार्यान्वित झाला. मात्र टॉवरची क्षमता कमी आणि ग्राहकांची संख्या वाढल्याने परिस्थिती बिकट झाली आहे. ४ जी आणि ५ जीच्या नावाखाली महागडे रिचार्ज करूनही नेट टूजी वेगाने चालत असल्याने ग्राहक त्रस्त झाले आहेत. परिणामी पैसा वाया जात असूनही अपेक्षित सुविधा मिळत नसल्याने कंपनीविषयी संताप व्यक्त केला जात आहे.

वज्रेश्वरी आणि गणेशपुरीसारख्या तीर्थक्षेत्र व पर्यटनस्थळीही पुरेशा रेंजचा अभाव आहे. त्यामुळे सीमकार्ड कोणत्या कंपनीचे वापरावे, असा प्रश्न नागरिकांपुढे निर्माण झाला आहे. याशिवाय गावातील वीज गायब होताच जिओ टॉवरचे नेटवर्क पूर्णपणे बंद होते. त्यामुळे टॉवरसाठी स्वतंत्र ट्रान्स्फॉर्मर किंवा जनरेटरची व्यवस्था करावी, अशी मागणी संतप्त नागरिकांनी केली आहे.

गावात जियो कंपनीचा टॉवर उभारून काही वर्षे लोटली आहेत; मात्र येथे टॉवर असून नसल्यासारखी परिस्थिती आहे. कंपनीच्या वरिष्ठांनी दखल घेत मोबाईलधारकांच्या समस्या सोडवाव्यात.
- सुनील देवरे, गणेशपुरी, भिवंडी