बागेश्री गृहसंकुलात पाणीगळतीचा गंभीर प्रश्न,
सिडकोकडून तातडीने ठोस उपाययोजना करण्याची मागणी
खारघर, ता. २१ (बातमीदार) : खारघर सेक्टर-४० मधील सिडकोच्या बागेश्री गृहसंकुलात पाणीगळतीचा प्रश्न दिवसेंदिवस गंभीर होत चालला आहे. या गृहनिर्माण प्रकल्पातील अनेक घरांमध्ये गळती लागल्यामुळे रहिवाशांमध्ये प्रचंड नाराजी व्यक्त केली जात आहे. यासंदर्भात सिडकोकडून अद्याप ठोस उपाययोजना करण्यात आलेली नाही. त्यामुळे रहिवाशांनी संताप व्यक्त करत तातडीने कारवाई करण्याची मागणी केली आहे.
सिडकोने २०१८ मध्ये जाहीर केलेल्या खारघर सेक्टर-४० मधील बागेश्री गृहनिर्माण लॉटरी अंतर्गत जुलै २०२१ पासून विजेत्यांना सदनिकांचा ताबा देण्यात आला, परंतु अवघ्या चार वर्षांतच बहुसंख्य घरांमध्ये गळतीच्या समस्या उभ्या राहिल्या आहेत. निकृष्ट दर्जाचे बांधकाम आणि देखभालीतील हलगर्जीमुळे ही परिस्थिती निर्माण झाल्याचा आरोप रहिवाशांनी केला आहे.
गळतीविषयी विचारणा केली असता, सिडकोकडून व्यवस्थापनासाठी नेमलेल्या बी. जी. शिर्के कन्स्ट्रक्शन कंपनीकडून फक्त तात्पुरते उपाय केले जातात, मात्र पावसाळा सुरू होताच पुन्हा गळती सुरू होते. या समस्येबाबत रहिवाशांनी सिडकोकडे अनेकदा लेखी तक्रारी केल्या असल्या तरी त्याकडे सातत्याने दुर्लक्ष केले जात असल्याचा आरोप त्यांनी केला आहे. दरम्यान, सिडको जनसंपर्क अधिकारी प्रिया रातांबे यांच्याशी संपर्क साधण्याचा प्रयत्न केला असता प्रतिसाद मिळू शकला नाही. रहिवाशांचा रोष वाढत असून, लवकरात लवकर योग्य ती कारवाई न झाल्यास हा मुद्दा तीव्र होण्याची शक्यता आहे.
...............
व्यवस्थापन समितीची भूमिका
अलीकडेच स्थापन झालेल्या व्यवस्थापन समितीने पहिल्याच बैठकीत या समस्येवर ठोस भूमिका घेतली आहे. पाण्याच्या गळतीचा मूळ शोध घेण्यासाठी थर्मल इमेजिंग तंत्रज्ञान वापरून संपूर्ण इमारतींची तपासणी करण्याची मागणी सिडकोकडे करण्यात आली आहे. तसेच करारनाम्यानुसार सर्व सेवा पुरविणे सिडकोची जबाबदारी असल्याचे समितीने स्पष्ट केले आहे. सिडकोने याकडे दुर्लक्ष केल्यास सोसायटीच्या वतीने सिडको मुख्यालयावर आंदोलन छेडले जाईल, असा इशारा समितीने दिला आहे.