मुंब्रावासीयांना मिळणार उच्च दर्जाचे उपचार
मौलाना हकीम अजमल रुग्णालय कात टाकणार
सकाळ वृत्तसेवा
ठाणे, ता. २१ : गेल्या अनेक दिवसांपासून सुविधांच्या बाबतीत तक्रार होत असलेले मुंब्य्राच्या मौलाना हकीम अजमल खान रुग्णालय आता कात टाकणार आहे. लवकरच या रुग्णालयात अद्ययावत उपचार यंत्रणा सुरू करण्यात येणार आहे. तज्ज्ञ डॉक्टरांची नियुक्ती करत केवळ मुंब्रावासीयांसाठीच नव्हे तर ठाणे पालिका क्षेत्रातील रुग्णांनाही येथे मोफत उपचार मिळणार आहेत.
मुंब्राच्या मौलाना हकीम अजमल खान रुग्णालयातील सुविधांबाबत नागरिकांमध्ये नाराजी व्यक्त केली जात होती. ही बाब स्थानिक डॉ. जितेंद्र आव्हाड यांच्या निदर्शनास आल्यानंतर त्यांनी संबधित खात्याशी पत्रव्यवहार करून वैद्यकीय सुविधा देण्याबाबत सूचना केल्या होत्या. याबाबत शानू पठाण, सय्यद अली अश्रफ, शमीम खान यांनी जोरदार पाठपुरावा केला. त्यानंतर उपायुक्त उमेश बिरारी आणि वैद्यकीय अधिकारी प्रसाद पाटील यांनी नुकतेच एका विशेष बैठकीचे आयोजन केले होते. या बैठकीत मुंब्र्याच्या मौलाना हकीम अजमल खान रुग्णालयाचे संचालन करणाऱ्या प्लॅटिनम हॉस्पिटलच्या व्यवस्थापनास शमीम खान यांनी चांगलेच धारेवर धरले होते. महात्मा जोतिबा फुले आरोग्यदायी योजनेची प्रभावी अंमलबजावणी, ओपीडी रुग्णांसाठी औषध वितरणासाठी खिडक्या वाढविणे, विशेषज्ज्ञांची नेमणूक करणे, आपत्कालीन कक्षात एमबीबीएस डॉक्टर तैनात करणे, आवश्यकतेनुसार तत्काळ शस्त्रक्रिया करणे, जनसंपर्क अधिकारी नियुक्त करणे, नोकरभरती करणे आदी मागण्या शमीम खान यांनी लावून धरल्या. या सर्व मागण्यांची पूर्तता करण्याचे आदेश उपायुक्त बिरारी यांनी दिले आहेत. त्यामुळे लवकरच हे रुग्णालय कात टाकणार असून, दर्जेदार आरोग्य सुविधा मिळण्यास मदत होणार आहे.