धेरंड-शहापूर औद्योगिक रस्त्यासाठी मोबदला वाटपाला सुरुवात
करारपत्र सादरीकरणासाठी २९ ऑगस्ट अंतिम मुदत
अलिबाग, ता. २५ (वार्ताहर) : तालुक्यातील शहाबाज येथील जमिनींचे संपादन महाराष्ट्र औद्योगिक विकासअंतर्गत धेरंड-शहापूर औद्योगिक क्षेत्र आणि पोहोच रस्त्याच्या उभारणीसाठी सुरू आहे. या प्रकल्पासाठी एकूण ८.५५.८० हेक्‍टर क्षेत्र संपादित करण्यात येत असून बाधित शेतकऱ्यांना मोबदला वाटपाची प्रक्रिया सुरू झाली आहे.
या संपादित जमिनींसाठी उच्चाधिकार समितीने सात जुलै रोजी दर निश्चित केला आहे. मंजूर दरानुसार, प्रति एकरी ९६ लाख ६९ हजार ५५४ रुपये म्हणजेच प्रति हेक्टर २ कोटी ४१ लाख ७३ हजार ८८६ रुपये इतका मोबदला देण्यात येणार आहे. या अनुषंगाने महाराष्ट्र औद्योगिक विकास अधिनियमनुसार खातेदारांना संमती करारपत्र सादर करण्याच्या नोटिसा बजावण्यात आल्या आहेत. प्रारंभी ३१ जुलैपर्यंत मुदत दिली होती, ज्यामध्ये काही शेतकऱ्यांनी करारपत्र सादर केले असून त्यांचा मोबदला आरटीजीएस किंवा एनईएफटीद्वारे त्यांच्या बँक खात्यात जमा करण्यात आला आहे.
तथापि, अजूनही काही खातेदारांनी करारपत्र सादर केलेले नाही. त्यासाठी अंतिम संधी म्हणून २९ ऑगस्ट ही शेवटची तारीख देण्यात आली आहे. ज्या खातेदारांना उच्चाधिकार समितीने निश्चित केलेला दर मान्य असेल, त्यांनी उपविभागीय अधिकारी, अलिबाग यांच्या कार्यालयात शासकीय कामकाजाच्या वेळेत, सुट्ट्या वगळता, स्वतः उपस्थित राहून संमती करारपत्र सादर करावे, असे आवाहन करण्यात आले आहे.
...................
उपविभागीय अधिकारी मुकेश चव्हाण यांनी सांगितले की, सर्व बाधित शेतकऱ्यांनी ही संधी गमावू नये. मुदतीनंतर सादर झालेली करारपत्रे ग्राह्य धरली जाणार नाहीत. धेरंड-शहापूर औद्योगिक क्षेत्र हा कोकणातील महत्त्वाचा औद्योगिक प्रकल्प असून या प्रकल्पामुळे प्रदेशात मोठ्या प्रमाणावर औद्योगिक विकासाला चालना मिळणार आहे.