शालेय अभ्यासक्रम मसुद्यासाठी सामाजिक भान, शैक्षणिक भूमिका महत्त्वाची
शिक्षण विकास मंचच्या शिक्षण कट्ट्यात खुली चर्चा
मुंबई, ता. २५ ः राज्य सरकारने नुकताच शालेय शिक्षण अभ्यासक्रम मसुदा-२०२५ प्रसिद्ध केला आहे. हा मसुदा जनतेच्या अभिप्रायासाठी खुला करण्यात आला आहे. याबाबत सामाजिक भान आणि शैक्षणिक भूमिका तयार व्हावी, यासाठी शिक्षण विकास मंच, यशवंतराव चव्हाण सेंटर, मुंबई यांच्या वतीने शनिवारी शिक्षण कट्टा आयोजित करण्यात आला होता. या कट्ट्यात हा अभ्यासक्रम विद्यार्थ्यांकरिता आहे. त्यामुळे जास्तीत जास्त चांगल्या पद्धतीचा अभ्यासक्रम तयार व्हावा, या विचारांवर तज्ज्ञांनी भर देत यावर खुली चर्चा केली.
यशवंतराव चव्हाण सेंटरच्या शिक्षण विकास मंचचे मुख्य समन्वयक डॉ. माधव सूर्यवंशी यांनी कट्ट्याला उपस्थिताचे स्वागत केले. या वेळी त्यांनी कट्ट्याच्या आयोजनामागची भूमिका मांडली. शिक्षण विकास मंचचे मुख्य संयोजक ज्येष्ठ शिक्षणतज्ज्ञ डॉ. वसंत काळपांडे यांनी प्रास्ताविक केले. लवचिकता हे या अभ्यासक्रमाचे महत्त्वाचे वैशिष्ट्य असून, विद्यार्थ्यांच्या गरजा लक्षात ठेवून तो तयार केला आहे. या अभ्यासक्रमात काय असायला हवे याबाबत सूचना यायला हव्यात, असे त्यांनी प्रास्ताविकात सांगितले.
या कट्ट्यात अभ्यासक्रम मसुदा विषयावर तज्ज्ञ मार्गदर्शक म्हणून संपदा जोशी (मराठी), स्वाती ताडफळे (मराठी), अचला मचाडो (इंग्रजी), अजित तिजोरे (गणित), शशिकला पाटील (विज्ञान), राहुल प्रभु (इतिहास, नागरिकशास्त्र), भाऊसाहेब उमाटे (इतिहास, राज्यशास्त्र), पद्माकर हिरनाईक (भूगोल), दिनेश जोशी (अर्थशास्त्र) या तज्ज्ञ मार्गदर्शकांनी अभ्यासपूर्ण सादरीकरण केले. तसेच शासनाला तपशीलवार सूचना केल्या.
कट्ट्याचा समारोप शिक्षण विकास मंचच्या विशेष सल्लागार बसंती रॉय यांनी केला. मसुद्याबाबत शिक्षण क्षेत्रातील विविध घटकांना कल्पना यावी, यासाठी या कट्ट्याचे आयोजन करण्यात आले असल्याचे त्यांनी सांगितले. मसुद्यातील चांगल्या बाबी तसेच त्रुटींवर साधक बाधक चर्चा झाल्याचे त्यांनी सांगितले. हा अभ्यासक्रम अतिशय काळजीपूर्वक तयार करण्यात आला असून, राष्ट्रीय शैक्षणिक धोरणातील ध्येयांना पूर्ण न्याय या मसुद्यात देण्यात आला असल्याचे तज्ज्ञांनी सांगितले. शिक्षकांनी पाठ्यपुस्तकांबरोबरच अभ्यासक्रम मसुद्याचा अभ्यास केला पाहिजे, अशी अपेक्षा त्यांनी समारोपाच्या मनोगतात केली. सोबतच या अभ्यासामुळे त्यांच्या अध्ययन अध्यापनाला दिशा मिळेल, अशी अपेक्षा त्यांनी व्यक्त केली. तज्ज्ञ, अभ्यासक, शिक्षक यांच्याकडून आलेल्या सूचना शिक्षण विकास मंचकडून एससीईआरटीकडे एकत्रित पाठवणार असल्याचे यावेळेस मुख्य समन्वयक डॉ. माधव सूर्यवंशी यांनी सांगितले.