कवी अरुण म्हात्रे यांच्या कवितांनी साहित्यप्रेमी मंत्रमुग्ध
पालघर, ता. २४ ः कवी अरुण म्हात्रे यांनी सुप्रसिद्ध कवींच्या निवडक पाऊस व निसर्ग कवितांचे अभिवाचन व कविता गायनाच्या मैफलीद्वारे सादरीकरण करून पालघरमधील साहित्य रसिकांना मंत्रमुग्ध केले.
सोनोपंत दांडेकर महाविद्यालय आणि वाचनवेल यांच्या संयुक्त विद्यमाने साहित्यप्रेमींसाठी नभं उतरू आलं ना. धों महानोर काव्यमैफलीचा सोहळा शनिवारी (ता.२३) सोनोपंत दांडेकर महाविद्यालयात पार पडला.
विज्ञान कथालेखक चंद्रकांत घाटाळ यांनी लिहिलेल्या बिन आडनावाची पोरी व अनुराधा इंदुलकर या दोन पुस्तकांचा प्रकाशन सोहळा प्रमुख अतिथी कवी अरुण म्हात्रे यांच्या हस्ते पार पडला. सुप्रिया पाटील यांनी वाचनवेल उपक्रमाबद्दल माहिती दिली. तदनंतर सुप्रसिद्ध कवी अरुण म्हात्रे यांनी काव्यवाचन करून व काही विनोदी चारोळ्या सादर केल्या. शेवटी ना. धों महानोरांची ‘नभं उतरू आलं’ ही कविता गाऊन साहित्य रसिकांनी नभ ओथंबून आल्याची अनुभूती अनुभवली.
या कार्यक्रमाला प्रा. विवेक कुडू, पारितोषिणी वैद्य, अंकिता पाटील, सुप्रिया पाटील, सुविधा लोखंडे, विजय ठाकूर, रमाकांत पाटील, मर्मबंध, ॠतुगंध, कोमसाप पालघर व आरोहनचे पदाधिकारी, वाचनवेलचे वाचक आणि साहित्यप्रेमी उपस्थित होते.