गणेशोत्सवासाठी कोपरखैरणे परिसरात उत्साहाचे वातावरण
नवी मुंबई, ता. २४ (बातमीदार) : कोपरखैरणे आणि घणसोली परिसरात आगामी गणेशोत्सवाच्या तयारीला जोर आला आहे. सार्वजनिक मंडळांकडून मंडप उभारणीची कामे सुरू असून, सजावटीच्या साहित्यामुळे बाजारपेठा गजबजून गेल्या आहेत.
महानगरपालिकेकडून मंडप उभारणीसाठी परवानग्या दिल्या जात आहेत. त्याचबरोबर सुरक्षेच्या दृष्टीने अग्निशमन दलाचे नियम, वाहतुकीस अडथळा न होणे, तसेच पर्यावरणपूरक गणेशमूर्तींचा वापर करण्याचे आवाहन करण्यात आले आहे. दरम्यान, मंडळांनी यंदा देखाव्यांमध्ये सामाजिक संदेशांवर भर देण्याचा निर्णय घेतला आहे. दिवसरात्र सुरू असलेल्या तयारीमुळे परिसरात उत्सवी वातावरण रंगले आहे.