स्वच्छतागृह बनले नशेखोरांचा अड्डा
वाचनालयासाठी महापालिकेकडे मागणी
कल्याण, ता. २५ (बातमीदार) : विठ्ठलवाडीतील खडेगोळवली येथील प्रभाग क्रमांक ९६ मध्ये उभारण्यात आलेले एमएमआरडीएचे दुमजली स्वच्छतागृह सध्या नशेखोर आणि अमली पदार्थ सेवन करणाऱ्यांचे अड्डे बनले आहे. या वास्तूचा मूळ उद्देश असलेला स्वच्छता उपयोग पूर्णपणे बंद पडल्याने स्थानिक नागरिक त्रस्त झाले आहेत. यावर उपाय म्हणून हे स्वच्छतागृह हटवून त्या ठिकाणी वाचनालय अथवा मंदिर उभारण्याची मागणी स्थानिकांनी केली आहे.

विशाल जाधव या स्थानिक नागरिकाने कल्याण डोंबिवली महापालिकेला लेखी तक्रार करीत ही मागणी केली आहे. त्यांच्या म्हणण्यानुसार परिसरातील घरांत वैयक्तिक शौचालयांची व्यवस्था असल्याने हे सार्वजनिक स्वच्छतागृह वापरातच नाही. तसेच नशेखोर आणि गर्दुल्ले यांचा मोठा वावर या वास्तूत असून, त्यातून बाहेरच्या गुन्हेगारी प्रवृत्तीचे टोळके येथे जमू लागल्याचे म्हटले आहे. याचा सर्वाधिक त्रास महिला आणि लहान मुलांना होत आहे. २००९मध्ये या स्वच्छतागृहाचे काम सुरू असताना एका लहान मुलाचा खड्ड्यात पडून मृत्यू झाल्याचीही गंभीर घटना घडली होती.

काय करता येईल?
नागरिकांची मागणी आहे, की हे स्वच्छतागृह पाडून त्या ठिकाणी जनतेच्या उपयोगाचे वाचनालय किंवा मंदिर उभारावे.
स्थानिक प्रशासन आणि पोलिसांनी नशेखोरांविरोधात कारवाई करीत परिसर स्वच्छ व सुरक्षित ठेवावा.

अमली पदार्थविरोधी कारवाई
कल्याण परिमंडळ ३ अंतर्गत अमली पदार्थविरोधी मोहिमा राबवल्या जात असून, याअंतर्गत गांजा व इतर पदार्थांची तस्करी करणाऱ्यांवर अटकेची कारवाई करण्यात येत आहे. तथापि, खडेगोळवली परिसरात अजूनही काही ठिकाणी टोळक्यांनी अड्डे कायम राखले आहेत, ही चिंतेची बाब स्थानिक नागरिकांकडून व्यक्त करण्यात येत आहे.