कोपरीतील ‘एसआरए’मध्ये भाडेकरूचा गुदमरून मृत्यू?
गणेश नाईक यांचे चौकशीचे आदेश

सकाळ वृत्तसेवा
ठाणे, ता. २५ : कोपरी येथे एसआरए प्रकल्पात विक्रीसाठीच्या इमारतीत भाड्याने राहणाऱ्या एका व्यक्तीचा गुदमरून मृत्यू झाल्याचा संशयास्पद प्रकार उघड झाला आहे. याप्रकरणी वनमंत्री गणेश नाईक यांच्या जनता दरबारात तक्रार केल्यानंतर, त्यांनी चौकशीचे आदेश पोलिस आयुक्तांना दिले आहेत.
कोपरी येथे एका बिल्डरमार्फत एसआरए प्रकल्पातील पार्किंगसाठी इमारत उभारण्यासाठी पाया खोदला जात होता. त्यात इमारतीलगतच्या चार खोल्यांचे नुकसान होण्याची भीती होती. त्यामुळे संबंधित बिल्डरने खोल्या तोडून रहिवाशांना पुन्हा नव्याने बांधून देण्याची लेखी हमी दिली होती. त्यातील रहिवासी इंदू शुक्ला यांना रूम तोडल्यामुळे भाडे दिले जात नव्हते, मात्र भाडे देण्याऐवजी संबंधित बिल्डरने त्यांचा पोटभाडोत्री सुरेश बुजवाणी यांना बांधकाम सुरू असलेल्या पाचव्या मजल्यावर जागा दिली गेली. ती राहण्यायोग्य नव्हती. या ठिकाणी त्यांचा अचानक मृत्यू झाला. इमारतीतून दुर्गंधी येत असल्यामुळे शोध घेतल्यानंतर सुरेश यांचा मृतदेह आढळला होता. ३१ जुलैला ही घटना घडली होती. बुजवाणी यांचा गुदमरून मृत्यू झाला असल्याचा आरोप कोपरीतील रहिवासी अभिजित पवार यांनी केला आहे. याप्रकरणी कोपरी पोलिसांकडून कोणतीही माहिती जाहीर करण्यात आली नसल्याचे पवार यांनी सांगितले. या पार्श्वभूमीवर अभिजित पवार यांनी वनमंत्री गणेश नाईक यांच्या जनता दरबारात धाव घेतली. तसेच या मृत्यूप्रकरणी चौकशी करून कारवाई करण्याची विनंती केली. त्यानंतर पालकमंत्री गणेश नाईक यांनी पोलिस आयुक्त आशुतोष डुंबरे यांना चौकशी करण्याचे आदेश दिले आहेत.