रेल्वेस्थानकात घुसली एनएमएमटीची बस
जीवितहानी टळली

पनवेल, ता. २५ (बातमीदार) ः पनवेल रेल्वेस्थानक परिसरात सोमवारी (ता. २५) सकाळी दुर्घटना घडली. नवी मुंबई महानगर परिवहन महामंडळाची (एनएमएमटी) वातानुकूलित बस थेट स्थानकाच्या कंपाउंड वाॅलला धडकली. या अपघातात कोणतीही जीवितहानी झालेली नाही.
बस क्रमांक ७३ रेल्वेस्थानकात प्रवेश करीत असताना चालकाचे नियंत्रण सुटल्याने हा अपघात घडला. धडकेमुळे स्थानकाजवळील बसथांबा क्रमांक दोनचेदेखील नुकसान झाले आहे. बसचे मोठ्या प्रमाणावर नुकसान झाले असून, घटनास्थळी काही काळ गोंधळाचे वातावरण निर्माण झाले. अपघातानंतर तातडीने प्रवाशांना सुरक्षितरीत्या बाहेर काढण्यात आले. रेल्वेस्थानक परिसरात मोठी गर्दी झाल्याने वाहतूक पोलिसांना परिस्थिती नियंत्रणात आणण्यासाठी अतिरिक्त कसरत करावी लागली. अपघाताचे नेमके कारण शोधण्यासाठी एनएमएमटी आणि पोलिस प्रशासनाने तपास सुरू केला आहे.