बाप्पाला दागिन्यांचा साज
नयनरम्य आभूषण खरेदीसाठी दादर, लालबाग गजबजले
प्रभादेवी, ता. २५ (बातमीदार) : गणेशोत्सवात अनेकजण सजावटीसाठी विविध पर्यायांचा अवलंब करतात. अगदी मखर सजावटीपासून गणेशाची वस्त्र इथपर्यंत जय्यत तयारी केली जाते. यात आणखी भर पडावी, यासाठी आकर्षक, नयनरम्य आभूषण खरेदी करण्यासाठी ग्राहकांची दादर, लालबागच्या बाजारात गर्दी होत आहे.
बाप्पाचे नयनरम्य रूप आणि त्यावर चढवलेला दागिन्यांचा साजशृंगार गणेशोत्सवात सगळीकडे पाहायला मिळतो. सुंदर आभूषणांनी गणरायचे नेत्रदीपक रूप अनुभवता यावे, यासाठी ग्राहक नाना तऱ्हेचे पर्याय अवलंबतात.
लालबागच्या बाजारात डोळे दिपवणारे, सोन्यालाही मागे टाकतील अशी वेगवेगळ्या प्रकरची दागिने व आभूषणे विक्रीसाठी उपलब्ध असून, ही आभूषणे खरेदीकारिता लालबागच्या बाजारात ग्राहकांची लागबग दिसून येत आहे.
सोंडपट्टा, कर्णफूल, ५१ दुर्वांचा हार, जास्वंद, मुकुट, गदा, जानव्हे, बाली, गणेशाचा पाय, याप्रकारचे सुंदर आकर्षक आभूषण विक्रीसाठी उपलब्ध आहे. आभूषणे खरेदी करण्याकडे ग्राहकांचा जास्त कल असल्याचे भवानी आर्टसचे विकास चौधरी यांनी सांगितले.
सोने महाग झाले असले तरीदेखील गणपतीला साजशृंगारात काही कमी पडू नये यासाठी नकली दागिने खरेदी करण्याकडे भाविकांचा जास्त कल दिसून येत आहे. लालबाग मार्केटमध्ये दागिन्यांची अनेक दुकाने सजली असून, कर्ण फुल, बिग बाली, सोंड पट्टा, मोत्यांचे हार, कडे, विविध प्रकारचे सोन्यासारखे चांगल्या प्रतीचे दागिने विक्रीसाठी ठेवण्यात आले आहेत.
कानिश हार, बाजूबंद, मोत्यांचा हार, कडे, सोंडपट्टा, कर्णफुले, मोदक याना घरगुती गणपतींसाठी मागणी असल्याचेही विक्रेत्यांनी सांगितले. जास्वंदीचे फुल, मोदक, गणपतीची गदा, सोन्याची फळे लालबाग, दादर मार्केटमध्ये मिळत आहेत.

या दागिन्यांना मागणी
यंदा गणपतीच्या सोंडेला लावण्यासाठी खास बनविण्यात आलेला सोंडपट्टा, सोन्याचा दात, सोन्याचा पाय, शेला, शाल, कानाला लावण्यासाठी रत्नजडित कर्णफुले सर्वांचे लक्ष वेधून घेत आहेत. बहुतांश कार्यशाळेत अशा दागिन्यांनी गणपतीला साज शृंगार करण्यात येत आहे. त्यामुळे असे गणपती ग्राहकांना आकर्षित करीत आहेत, तर काही ग्राहकांना त्यांच्या मागणीनुसार साजशृंगार करून देण्यात येत आहे.