बदलापूर, ता. २५ (बातमीदार) : बदलापूर-कर्जत राष्ट्रीय महामार्ग क्रमांक ७६ या महामार्गावर वांगणीमधील गोरेगाव ते ढवळेपाडा परिसरातील ९०० मीटर रस्त्याची पुरती दुरवस्था झाली आहे. या रस्त्यावर अनेक खड्डे पडले आहेत. त्यामुळे गणेशोत्सवापूर्वी हा रस्ता दुरुस्त करण्यात यावा; अन्यथा आंदोलन करण्यात येईल, असा इशारा मनसेकडून देण्यात आला आहे.
मुंबई ते बदलापूर हा महामार्ग पुढे कर्जत-पुणेकडे जाणारा राष्ट्रीय महामार्ग आहे. या रस्त्यावरून शेकडो वाहनांची रोज वर्दळ असते. याच महामार्गावरील गोरेगाव ते ढवळेपाडा या पट्ट्यातील ९०० मीटर च्या रस्त्यावर मोठमोठे खड्डे पडले आहेत. हा रस्ता पुरता खचल्याने दुरुस्त करण्याची मागणी करण्यात आली आहे. हा रस्ता गणेशोत्सवापूर्वी दुरुस्त झाला नाही तर, आंदोलनाचा इशारा मनविसेचे विभागअध्यक्ष जयेश केवणे यांनी दिला आहे.

काही दिवसांत पाऊस खूप असल्यामुळे, रस्त्यावर खड्डे पडले आहेत. पावसामुळेच रस्त्याचे काम करता येणे शक्य होत नाही. गणेशोत्सवापूर्वी सार्वजनिक बांधकाम विभागाकडून, तात्पुरत्या स्वरूपात हे खड्डे बुजवले जातील. पावसाळा संपल्यानंतर डांबरीकरण करून रस्ता दुरुस्त केला जाईल.
- प्रशांत कुमार मानकर, उपअभियंता
सार्वजनिक बांधकाम विभाग

बदलापूर : ढवळेपाडा ते गोरेगाव रस्त्याची अत्यंत दुरवस्था झाली आहे.