गणेशोत्सव सुट्टीविषयी शाळांमध्ये संभ्रम

तुर्भे, ता. २५ (बातमीदार) ः नवी मुंबई महानगरपालिका शिक्षण विभागाने २६ ऑगस्ट ते २ सप्टेंबरपर्यंत गणेशोत्सवाची सुट्टी घोषित केली आहे. तसे पत्रक सर्व व्यवस्थापन, सर्व माध्यम, प्राथमिक/माध्यमिक शाळाचे मुख्याध्यापक यांना पाठवले. मात्र, त्यानंतर दोन तासांतच आणखी एक सुधारित परिपत्रक काढण्यात आले. यामध्ये मराठी माध्यम (पालिका/अनुदानित शाळा) यांना २६ ऑगस्ट ते २ सप्टेंबरपर्यंत आणि इंग्रजी माध्यमाच्या विनाअनुदानित शाळांना २७ ऑगस्ट ते २ सप्टेंबरपर्यंत गणेशोत्सवाची सुट्टी देण्यात यावी, असे म्हटले आहे. या परिपत्रकामध्ये इंग्रजी विभागाच्या अनुदानित शाळांचा उल्लेख नाही. त्यामुळे या शाळांना उद्या की परवापासून सुट्टी आहे, याविषयी गोंधळ निर्माण झाला आहे. तसेच सकाळी एक परिपत्रक आल्यानंतर सर्व अनुदानित इंग्रजी माध्यमाच्या शाळांनी विद्यार्थ्यांना २६ ऑगस्टपासून सुट्टी घोषित केली होती; मात्र त्यानंतर दोन तासांतच दुसरे सुधारित परिपत्रक आल्याने पुन्हा या शाळांनी उद्या शाळा चालू असल्याचे विद्यार्थ्यांना कळवले आहे. दरम्यान, आदेशाची अंमलबजावणी न केल्यास कोणाची तक्रार आल्यास त्याला संबंधित शाळेचे व्यवस्थापन जबाबदार राहील, असे सांगून शिक्षण विभागाने सांगितल्याने आश्चर्य व्यक्त केले जात आहे.