भाईंदरमध्ये लाखो रुपयांचा गुटखा जप्त
भाईंदर, ता. २६ (बातमीदार) : भाईंदर पूर्व भागात पोलिसांच्या गुन्हे शाखा युनिट १ ने दोन स्वतंत्र कारवाया करत सुमारे २७ लाख रुपयांचा अवैध गुटखा जप्त केला असून, दोन आरोपींना ताब्यात घेतले आहे.
यातील पहिली कारवाई गोल्डन नेस्ट रोड येथील एका इमारतीत झाली. एका दुकानाच्या गाळ्यात मोठ्या प्रमाणात गुटख्याचा साठा असल्याची माहिती पोलिसांना मिळाली होती. पोलिसांनी सोमवारी (ता. २५) छापा टाकल्यावर त्यांना २५ लाख २० हजार ६६३ रुपयांचा गुटखा आढळला. हा गाळा गौरव जयंतीभाई हप्पानी याच्या नावावर असून, त्याच्यावर गुन्हा दाखल करण्यात आला आहे.
दुसऱ्या घटनेत, पोलिसांनी गस्त घालत असताना बंसराज राधेशाम यादव नावाचा व्यक्ती दुचाकीवरून गुटखा घेऊन जात असताना आढळला. त्याच्या घरातूनही दोन लाख सात हजार रुपयांचा गुटखा जप्त करण्यात आला. गेल्या आठवड्यातही काशी मिरा येथून १५ लाखांचा गुटखा जप्त करण्यात आला होता. या घटनांवरून मिरा-भाईंदर शहरात गुटखाविक्रीची मोठी टोळी कार्यरत असल्याचा संशय असून, पोलिस या टोळीविरोधात कठोर मोहीम राबवत आहेत.