डोंबिवलीकर मूर्तिकार पोलिसांच्या ताब्यात
सातारा येथून अटक; गुन्हा दाखल
सकाळ वृत्तसेवा
डोंबिवली, ता. २८ : गणेशोत्सवाच्या एक दिवस आधी डोंबिवलीतील मूर्तिकार प्रफुल्ल तांबडे (वय २८) हा गणेशभक्तांची अडचण करून अचानक पसार झाला होता. या घटनेमुळे गणेशभक्त मोठ्या अडचणीत सापडले होते. याप्रकरणी विष्णुनगर पोलिस ठाण्यात गुन्हा दाखल करण्यात आला होता. पोलिसांचे पथक प्रफुल्ल याचा शोध घेत होते. अखेर सातारा येथून तांबडे याला ताब्यात घेतल्याची माहिती वरिष्ठ पोलिस निरीक्षक राम चोपडे यांनी दिली.

नेमकी घटना काय?
डोंबिवली पश्चिमेकडील आनंदी कला केंद्रात मूर्तिकार प्रफुल्ल तांबडेने गणेशमूर्तींची मोठ्या प्रमाणात बुकिंग घेतली होती; मात्र क्षमतेपेक्षा जास्त ऑर्डर घेतल्यामुळे तो वेळेवर मूर्ती तयार करू शकला नाही. गणेशोत्सवाच्या आदल्या दिवशी जेव्हा भाविक मूर्ती घेण्यासाठी आले, तेव्हा मूर्ती तयार नसल्याचं पाहून तिथे मोठा गोंधळ निर्माण झाला. याशिवाय, काही सार्वजनिक गणेश मंडळांच्या सदस्यांनी वेळेवर मूर्ती न दिल्यास तांबडे याला दम भरला होता. त्यामुळे घाबरून प्रफुल्ल आपल्या गावी साताऱ्याला पळून गेला.
या घटनेनंतर, अनेक भाविकांचे बुकिंगचे पैसे अडकले आणि त्यांना वेळेवर मूर्ती न मिळाल्याने त्रास झाला. परिस्थिती हाताळण्यासाठी विष्णुनगर पोलिसांनी घटनास्थळी मोठा बंदोबस्त ठेवला होता. पोलिसांनी शोध घेतल्यावर प्रफुल्लच्या कुटुंबीयांनी त्याला पोलिसांसमोर हजर केले. आज सकाळी प्रफुल्ल याला विष्णुनगर पोलिस ठाण्यात हजर करण्यात आले. त्याच्याविरुद्ध गुन्हा दाखल करण्यात आला असून, त्याला नोटीस बजावून न्यायालयात त्याच्यावर दोषारोपपत्र दाखल करणार असल्याची माहिती पोलिस सूत्रांनी दिली.