मराठा समाजाला आता खेळवू नये
नवी मुंबईतील मराठा कार्यकर्त्यांचा इशारा
वाशी, ता. २८ (बातमीदार) : सरकारने मराठा समाजाला आता खेळवू नये, असा इशारा देत ही लढाई आरक्षणाविना थांबणार नाही, असा निर्धार नवी मुंबईतील मराठा कार्यकर्त्यांनी व्यक्त केला आहे. वाशी येथे गुरुवारी (ता. २८) झालेल्या पत्रकार परिषदेत मराठा समाजातर्फे विनोद पोखरकर यांनी ही माहिती दिली.
मराठा आरक्षणाच्या मागणीसाठी मनोज जरांगे पाटील यांचे मुंबईतील आझाद मैदानावर शुक्रवारपासून (ता. २९) बेमुदत उपोषण सुरू होणार आहे. या पार्श्वभूमीवर जरांगे पाटील आणि मराठा समाजाचे कार्यकर्ते मोठ्या संख्येने मुंबईच्या दिशेने रवाना झाले आहेत. मराठा समाजाचे कार्यकर्ते गुरुवारी (२८ ऑगस्ट) संध्याकाळपासूनच पनवेल, खारघर आणि नवी मुंबई परिसरात दाखल झाले आहेत. आंदोलनाच्या तयारीसाठी नवी मुंबईतील सकल मराठा समाजाने जय्यत तयारी केली असून, आंदोलकांसाठी आवश्यक नियोजन करण्यात आले आहे.
या वेळी मराठा समाजाच्या कार्यकर्त्यांनी सरकारचा निषेध केला आणि आरक्षणात खोडा घालणाऱ्या गुणरत्न सदावर्ते व छगन भुजबळ यांच्याविरोधात घोषणाबाजी केली. विनोद पोखरकर यांनी मराठा कार्यकर्त्यांना शिस्तबद्धपणे आणि कायद्याचे पालन करीत आंदोलनात सहभागी होण्याचे आवाहन केले आहे.

वाशी टोलनाक्यावर घोषणांचा पाऊस
अंतरवाली सराटीसह राज्यातील विविध भागांतून आलेले मराठा बांधव वाशी टोलनाक्यावर मोठ्या संख्येने जमले होते. ‘या सरकारचं करायचं काय, खाली मुंडकं वर पाय’ अशा घोषणांनी परिसर दणाणून गेला. त्याबरोबरच मंत्री छगन भुजबळ यांच्याविरोधात जोरदार घोषणाबाजी करून गुणरत्न सदावर्ते यांच्याविरोधातही संताप व्यक्त करण्यात आला.

नवी मुंबईतील वाहतुकीत बदल
आंदोलनामुळे वाहतूक कोंडी टाळण्यासाठी नवी मुंबई पोलिसांनी वाहतुकीत बदल केले आहेत. आंदोलकांच्या वाहनांसाठी पळस्पे-गव्हाणफाटा-पामबीचमार्गे वाशी असा मार्ग निश्चित करण्यात आला आहे. इतर वाहनांसाठी मुंबई-पुणे द्रुतगती मार्ग, जेएनपीटी मार्ग आणि वाशी प्लाझा येथे प्रवेश बंद ठेवण्यात आला आहे. हलकी आणि दुचाकी वाहने पर्यायी मार्गाने जाऊ शकतात. आपत्कालीन सेवांना यातून वगळण्यात आले आहे.