चटणी-भाकरी खाऊ, पण ताकदीने लढू!
आंदोलकांचा निर्धार; १५ दिवसांचे किराणा सामान सोबत

बापू सुळे : सकाळ वृत्तसेवा
मुंबई, ता. २९ : मराठा समाजाने आपल्या हक्काच्या आरक्षणासाठी आरपारची लढाई सुरू केली आहे. आरक्षण घेतल्याशिवाय परत न फिरण्याची भूमिका आंदोलकांकडून घेतली जात आहे. त्यासाठी चटणी-भाकरी खाऊन दिवस काढू, पण आंदोलन ताकदीने लढू, असा निर्धार व्यक्त केला जात आहे. राज्यभरातून मुंबईत आंदोलनासाठी आलेल्या आंदोलकांनी आपल्या वाहनांमध्ये पुढील १५ दिवस पुरले एवढे सामान, गॅस, पाणी, जेवण बनवण्यासाठी लागणारे साहित्य अशा सर्वच वस्तू आणल्या आहेत.

आंदोलकांनी प्रत्येक गाडीत भाकरी-पिठलं, भाजी, भात, डाळ बनवण्यासाठी आवश्यक असलेले सर्व किराणा सामान आणले आहे. त्यामुळे जोपर्यंत सरकार आरक्षण देत नाही तोपर्यंत आंदोलन सुरूच राहील, असे आंदोलकांनी सांगितले. सध्या धुवाधार पाऊस सुरू असून, जेवण बनवताना कोणतीही अडचण येऊ नये म्हणून प्रत्येक गाडीमध्ये गॅस, पाण्याची टाकी ठेवली असून, गाडीतच जेवण बनवण्याची सोय करण्यात आली आहे. ज्या गावातून आंदोलक आले आहेत तिथून त्यांना दोन-तीन दिवसांतून तयार जेवणाची शिदोरी घेऊन गाडी येणार आहे. त्यासाठीचे संपूर्ण नियोजन झाल्याचे एका आंदोलकाने सांगितले.

आम्ही याआधीही आरक्षणासाठी मुंबईच्या दिशेने आलो होतो; पण तेव्हा सरकारने आम्हाला रिकाम्या हातानेच नवी मुंबईतून माघारी पाठवले. मात्र आता आरक्षण घेतल्याशिवाय परत जाणार नाही. त्यामुळे येथे १५ दिवस राहण्याच्या तयारीने आम्ही आलो आहोत. जेवणाची व्यवस्थाही चोख करण्यात आली आहे.
- सदाशिव गायकवाड, आंदोलक, जालना

मुंबईत राहायचे म्हटले की खाण्याचा मोठा प्रश्न निर्माण होतो. त्यामुळे आम्ही घरून येतानाच भाकरीचे पीठ, तांदूळ, गॅस, पाणी अशा वस्तू आणल्या आहेत. त्यामुळे तूर्तास तरी आंदोलनातून माघार घेणार नाही.
- नामदेव मोहिते, आंदोलक, परभणी

आरक्षण तडीस लावण्यासाठीच आम्ही आलो आहोत. त्यामुळे घरून निघतानाच तेथील कामाचे पुरते नियोजन केले आहे. लढाई जिंकण्यासाठी आलो आहे. आता मागे हाटणार नाही.
- रवि लगस, आंदोलक, करमाळा

मुंबईत सरकार किंवा कोणी राजकीय नेता आमची जेवणाची व्यवस्था करेल, या आशेवर आलेलो नाही. आम्ही घरून निघतानाच १०-१२ हजार रुपये गाडीतील प्रत्येकाने काढले आहेत. त्यामुळे आमची लढाई आम्हीच लढू. यामुळे व्यवस्थाही आम्हीच करीत आहोत.
- बिभीषण कोकळे, आंदोलक, बीड