ब्लॅकमेलिंगला कंटाळून तरुणीची आत्महत्या?
टिटवाळा, ता. २९ (वार्ताहर) : गणपतीच्या सजावटीसाठी मखर बनवत असताना, एका अज्ञात व्यक्तीच्या ब्लॅकमेलिंगला कंटाळून एका तरुणीने आत्महत्या केल्याची घटना कल्याण ग्रामीणमधील कल्याण तालुका पोलिस स्टेशन हद्दीत घडली आहे. या घटनेनंतर कुटुंबीयांनी शुक्रवारी (ता. २९) कल्याण तालुका पोलिस ठाण्यात धाव घेतली. पोलिसांनी संबंधित तरुणाविरुद्ध गुन्हा दाखल केला असून, पुढील तपास सुरू आहे. अशा घटना पुन्हा घडू नयेत, यासाठी आरोपीला कठोर शिक्षा देण्याची मागणी होत आहे.
ही तरुणी गणपतीच्या आगमनाच्या तयारीमध्ये मग्न होती आणि मखर बनवत असतानाच तिला आरोपीचा फोन आला. फोनवरील व्यक्तीने तिला ब्लॅकमेल करून पैशांची मागणी केली. याच व्यक्तीने यापूर्वी तिच्याकडून सोन्याची चैन आणि रोख रक्कम घेतली होती, अशी माहिती समोर आली आहे. सततच्या ब्लॅकमेलिंग आणि पैशांच्या मागणीमुळे तरुणी मानसिकरित्या अस्वस्थ झाली होती. या त्रासाला कंटाळून तिने अखेर आपलं जीवन संपवलं. पोलिसांनी दिलेल्या माहितीनुसार, गेल्या अडीच वर्षांपासून आरोपी आणि तरुणी यांच्यात प्रेमसंबंध होते.