भिवंडी (वार्ताहर) : शहरात वीजवितरण करणाऱ्या टोरंट पॉवर कंपनीकडून नियमित वीजचोरी करणाऱ्यांविरोधात कारवाई करण्यात येत आहे. तब्बल अडीच लाखांच्या वीजचोरीप्रकरणी एकाविरोधात गुन्हा दाखल करण्यात आला आहे. गौरीपाडा येथील निशांत चॅरिटेबल फिजिओथेरपी सेंटरजवळील मालमत्ता क्रमांक २२४ या इमारतीच्या दुसऱ्या मजल्यावर राहणारे शेख इरफान यांनी जवळ असलेल्या मिनी सेक्शनच्या खांबावर अनधिकृत केबल जोडणी करून वीजमीटरशिवाय बेकायदा वीजपुरवठा घेत सात हजार ८७२ युनिट वापरले. वर्षभराच्या कालावधीत दोन लाख ४७ हजार ८३२ रुपयांची वीजचोरी केल्याने शांतीनगर पोलिस ठाण्यात गुन्हा दाखल केला आहे.