ठाणे : नवीन बनवलेले मंगळसूत्र घेऊन बाळकुम येथील सरोजा देवी शुक्ला (वय ५३) या ते कापडी पिशवीमध्ये ठेवून बाजारपेठेत भाजीपाला खरेदी करीत होत्या. त्याच वेळी चोरट्याने कापडी पिशवीतील एक लाख आठ हजारांचे मंगळसूत्र वाटेतच चोरून नेले आहे. शुक्ला यांनी शुक्रवारी (ता. २२) जुने मंगळसूत्र नवीन बनवण्याकरिता ठाणे बाजारपेठेतील एका ज्वेलर्स दुकानात दिले होते. गुरुवारी (ता. २८) त्या नवीन मंगळसूत्र आणण्यासाठी दुपारी दुकानात गेल्या होत्या. त्या मंगळसूत्र घेऊन त्यांनी ते कापडी पिशवीत ठेवले आणि त्या जांभळी नाका ते कौपिनेश्वर मंदिरादरम्यान बाजारपेठेत भाजीपाला खरेदी करताना, चोरट्याने नवीन बनवलेले १२ ग्रॅमचे काळे मणी असलेले मंगळसूत्र चोरी केले. याप्रकरणी ठाणे नगर पोलिस ठाण्यात गुन्हा दाखल झाला आहे.