गणेशोत्सवात चोरट्यांचा धुमाकूळ
खारघर परिसरातील पाच दुकाने फोडली
खारघर, ता. ३१ (बातमीदार)ः सणासुदीच्या दिवसांमध्ये चोरीच्या घटनांमध्ये वाढ होताना दिसत आहे. शुक्रवारी (ता. २९) रात्री खारघर सेक्टर एकोणीसमधील पाच दुकानांमधील लाखोंचा मुद्देमाल चोरण्यात आला आहे. त्यामुळे सणासुदीच्या काळातच रहिवाशांमध्ये भीतीचे वातावरण आहे.
खारघर शहरातील राज टॉवरमधील ग्लोबल सिरॅमिक, रामदेव स्वीट अँड फरसाण मार्ट, देवराज प्लायवूड यांच्यासह मेडिकल व डेंटल क्लिनिकचे शटर तोडून चोरट्यांनी चोरी केल्याचे प्रकार उघडकीस आला आहे. तर एका दुकानातील तब्बल पाच लाख ७० हजारांची रोकड लंपास केली आहे. विशेष म्हणजे, चोरीचा हा प्रकार दुकानातील सीसीटीव्ही कॅमेरात कैद झाला आहे; पण पोलिसांकडून अपेक्षित सहकार्य मिळत नसल्याने व्यापारीवर्गात नाराजी पसरली आहे. त्यामुळे पोलिसांनी या प्रकरणात तातडीने कारवाई करावी, अशी मागणी केली आहे.
----------------------------
महिलांमध्ये दहशत
खारघर येथील सेक्टर बारामधील गणेश दर्शन सोसायटीमध्ये राहणाऱ्या ५७ वर्षीय महिलेच्या गळ्यातील ७२ हजार किमतीची बोरमाळची पोत हिसकावून धूम ठोकली. तर काही दिवसांपूर्वी सेक्टर ३५मध्ये घरकाम करणाऱ्या महिलेच्या गळ्यातील दागिने हिसकावण्यात आले होते.
----------------------------
पोलिसांचे दुर्लक्ष
रात्रीच्या वेळी सोसायटीच्या आवारात उभ्या असलेल्या दुचाकींमधील पेट्रोल चोरीच्या प्रकारात वाढ झाली आहे. चोरी करतानाचा प्रकार सीसीटीव्हीमध्ये कैद झाला आहे. त्यामुळे पोलिसांनी रात्रीच्या वेळी गस्त घालावी, अशी मागणी रहिवाशांनी केली आहे.