साई पूरब गणेशोत्सव मंडळाने जपली सामजिक बांधिलकी
रक्तदान, नेत्रचिकित्सा शिबिर, क्रीडा स्पर्धाचे केले आयोजन
कल्याण, ता. ३१ (वार्ताहर) : गणेशोत्सव कल्याण पश्चिमेतील कोळीवली येथील साई पुरब हौसिंग सोसायटीमध्ये सालाबादप्रमाणे यंदाही आयोजित केला आहे. मंडळाने रक्तपुरवठ्याचा तुटवडा लक्षात घेऊन या कार्याला खारीचा वाटा म्हणून लाईफ लाईन रक्तपेढी बापगांव यांच्या सहकार्याने रक्तदान शिबिराचे आयोजन केले होते. नागरिकांनीही त्यास भरभरून प्रतिसाद दिला.
लहान मुलांना मोबाईलच्या डिजिटल खेळापासून दूर ठेवण्यासाठी विविध मैदानी, वैयक्तिक आणि सांघिक खेळाचे आयोजन केले. त्यांच्या सुप्त कलागुणांना वाव मिळावा म्हणून नृत्य, गायन कार्यक्रमाचेही आयोजन केले होते. महिलांसाठी संगीत खुर्ची खेळण्यात आली. त्याचप्रमाणे सामुदायिक स्नेहभोजनाचा आस्वाद सर्वांनी घेतला. साई पुरब गणेशोत्सव मंडळाने राबविलेले उपक्रम कौतुकास्पद आहेत. हे सर्व कार्यक्रम यशस्वी करण्यासाठी प्रवीण उंबरे, कवीश्वर पाटील, नितीन सोनवणे, निलेश बोरसे, पवन पाटील, प्रकाश नाईक, विजय भोर, अशोक नायकवडी, अभिषेक सानप, प्रवीण सुरवसे, प्रीतम सोनवणे, चेतन दरेकर, भगवान ठाणगे, संदीप पाटील आणि शीतल दरेकर, शैला बोराडे, शिल्पा घिगे, सायली नाईक आदींनी विशेष परिश्रम घेतले.