अभिनेत्री प्रिया मराठेचे निधन
कर्करोगाशी झुंज अखेर अपयशी
सकाळ वृत्तसेवा
मुंबई, ता. ३१ ः मराठीसह हिंदी चित्रपट-मालिकांमध्ये काम केलेल्या अभिनेत्री प्रिया मराठे (वय ३८) हिचे कर्करोगामुळे रविवारी पहाटे चारच्या सुमारास निधन झाले. मिरा रोड येथील राहत्या घरी तिने अखेरचा श्वास घेतला. तिच्या पश्चात पती अभिनेते शांतनू मोघे असा परिवार आहे. तिच्या निधनाचे वृत्त कळताच मनोरंजन क्षेत्रातील अनेकांनी हळहळ व्यक्त केली. तिच्या पार्थिवावर सायंकाळी मिरा रोड स्मशानभूमीत अंत्यसंस्कार करण्यात आले.
प्रिया मराठेने ‘या सुखांनो या’ या मालिकेतून छोट्या पडद्यावर पदार्पण केले. त्यानंतर तिने ‘चार दिवस सासूचे’, ‘तुझेच मी गीत गात आहे’, ‘तू तिथे मी’ यांसारख्या मराठी मालिकांमध्ये महत्त्वाच्या भूमिका साकारल्या. मराठी आणि हिंदी टेलिव्हिजन क्षेत्रामध्ये प्रिया मराठेने चांगलेच नाव कमावले होते. बालाजी टेलिफिल्मच्या ‘पवित्र रिश्ता’ या मालिकेमधील ‘वर्षा’ ही भूमिका विशेष गाजलेली होती. ‘तुझेच मी गीत गात आहे’ ही तिची शेवटची मालिका ठरली. या मालिकेत काम करीत असताना तिने ही मालिका मध्येच सोडली होती. मध्यंतरी ती कर्करोगातून बरीही झाली होती; मात्र अलीकडेच तिच्या शरीरात कर्करोग पुन्हा पसरू लागला होता. एका खासगी रुग्णालयात तिच्यावर उपचार सुरू होते. अखेर आज सकाळी तिने या जगाचा निरोप घेतला. प्रियाने साकारलेल्या भूमिकांना प्रेक्षकांची नेहमीच उत्स्फूर्त दाद मिळाली. ती सोशल मीडियावरदेखील ॲक्टिव्ह असायची. विविध लूकमधील फोटो ती सोशल मीडियावर शेअर करीत असे. या अकाली निधनाने तिच्या चाहत्यांना मोठा धक्का बसला आहे. तिला अखेरचा निरोप देण्यासाठी मराठी चित्रपटसृष्टीतील कलाकार आणि तिची नातेवाईक मंडळी व मित्रमंडळी उपस्थित होती. अभिनेता अभिजित खांडकेकर, सुयश टिळक, अभिजित केळकर, ओमप्रकाश शिंदे, प्रार्थना बेहरे, जुई गडकरी, समीधा गुरू, आस्ताद काळे आदी कलाकारांनी तिचे अंतिम दर्शन घेतले.