जव्हार, ता. १ (बातमीदार) : जव्हारच्या राजे यशवंत सार्वजनिक वाचनालयाच्या वतीने रविवारी (ता. ३१) सकाळी ११ वाजता स्पर्धा परीक्षा मार्गदर्शन संवाद दुसरे सत्र घेण्यात आले. १०० वर्षांपेक्षा जुनी, ऐतिहासिक वास्तूमध्ये हे सत्र पार पडले असून, स्पर्धा परीक्षेची तयारी करणाऱ्या विद्यार्थ्यांची मोठ्या संख्येने उपस्थिती होती.
प्रमुख मार्गदर्शक म्हणून ललित मौळे यांनी विद्यार्थ्यांशी संवाद साधला. आपल्या जीवनप्रवासातील संघर्षमय क्षण मांडताना ते म्हणाले, मी कठीण परिस्थितीतून अधिकारी पदापर्यंत पोहोचलो. ध्येय साध्य होईपर्यंत मनोरंजन व इतर कार्यक्रमांना दूर ठेवून अभ्यासाला प्राधान्य दिले. पहिल्याच प्रयत्नात राज्यसेवेच्या तीन परीक्षा उत्तीर्ण झालो. त्यानंतर अधिक मेहनत घेऊन आज सहाय्यक संचालक (वित्त व लेखा सेवा) या पदावर कार्यरत आहे. त्यामुळे तुम्हीही मोठे ध्येय निश्चित करून कठोर परिश्रम करा. आवश्यक ते मार्गदर्शन व मदत करण्यासाठी सदैव तयार आहे. कार्यक्रमाचे अध्यक्ष कमलजीत धानमेहेर यांनी विद्यार्थ्यांना स्पर्धा परीक्षेकडे जास्त लक्ष देण्याचे आवाहन केले. ते म्हणाले, राजे यशवंत सार्वजनिक वाचनालयाचा जास्तीत जास्त फायदा घ्या आणि अधिकारी व्हा. तुमच्या वाटचालीत आवश्यक ती मदत करण्यासाठी सदैव तयार आहोत. या वेळी वाचनालयाचे पदाधिकारी, कर्मचारी तसेच विद्यार्थी उपस्थित होते.