ठाण्यात इमारतीचा स्लॅब कोसळला
सकाळ वृत्तसेवा
ठाणे, ता. २ : वागळे इस्टेट परिसरातील किसन नगर क्रमांक २ येथील तिवारी सदन इमारतीच्या दुसऱ्या मजल्यावरील रीता प्रकाश उपाध्याय यांच्या मालकीच्या रूममधील स्लॅब मंगळवारी (ता. २) दुपारी पावणेएक वाजण्याच्या सुमारास कोसळला. या दुर्दैवी घटनेत सुदैवाने कोणालाही दुखापत झाली नाही. घटनेनंतर महानगरपालिकेच्या आपत्ती व्यवस्थापन विभागाने तातडीने कारवाई करत संपूर्ण इमारत रिकामी केली. तसेच येथील १७ रहिवाशांना तात्पुरत्या स्वरूपात ठामपा शाळा क्रमांक २३ येथे राहण्याची सोय करण्यात आली आहे.

किसन नगर २ येथील मस्जिद गल्लीमधील, अंदाजे ४० वर्षांपूर्वी बांधलेल्या तळ अधिक तीन मजली या तिवारी सदन इमारतीत दुपारी १२.५० च्या सुमारास स्लॅब कोसळल्याची माहिती दक्ष नागरिक विकास इंगळे यांनी ठाणे महापालिकेच्या आपत्ती व्यवस्थापन कक्षाला दिली. घटनेची बातमी मिळताच आपत्ती व्यवस्थापन कक्षाच्या कर्मचाऱ्यांसह संबंधित विभागांनी घटनास्थळी धाव घेतली. सुरक्षेच्या कारणास्तव आपत्ती व्यवस्थापन कर्मचाऱ्यांनी इमारतीच्या सभोवताल धोकापट्टी लावून बॅरिगेटिंग केले. वागळे इस्टेट प्रभाग समितीच्या सार्वजनिक बांधकाम विभाग आणि अतिक्रमण विभाग यांच्या मार्फत पुढील कार्यवाही सुरू असल्याची माहिती आपत्ती व्यवस्थापन कक्षाने दिली आहे.