अंबरनाथ, ता. ४ (वार्ताहर) : राज्यात मराठीला अभिजात भाषेचा दर्जा मिळाला असला, तरी प्रत्यक्षात मराठी शाळांची दुरवस्था, घटती पटसंख्या आणि शाळा बंद होण्याचे चित्र कायम आहे. याच वास्तवाचे प्रतीक अंबरनाथमध्ये एका घरगुती गणेशोत्सवाच्या देखाव्यातून साकारले आहे. गोरुले परिवाराच्या या उपक्रमाने सर्वांचे लक्ष वेधले आहे.

अंबरनाथ पूर्व नवरेनगर परिसरातील प्रकाश गोरुले यांच्या घरी ११ दिवसांचे गणराय विराजमान झाले आहेत. गोरुले कुटुंब दरवर्षी समाजातील दुर्लक्षित विषयांवर आधारित देखावे साकारत असतात. यंदा त्यांनी मराठी भाषेची उपेक्षा अधोरेखित करणारा देखावा उभारला. यात बंद पडलेल्या जिल्हा परिषद शाळा, पडझड झालेली इमारत, रिकाम्या वर्गखोल्या आणि विद्यार्थी नसलेली शाळा अशी प्रतिकात्मक दृश्ये दाखवण्यात आली.
मराठीला अभिजात दर्जा मिळाला ही अभिमानाची बाब आहे. पण गावोगावी शाळा ओस पडत आहेत. विद्यार्थ्यांची संख्या घटत आहे. शिक्षकांची कमतरता आहे आणि अनेक शाळा बंद पडत आहेत. हे चित्र बदलले नाही, तर भविष्यात मराठी भाषेला गंभीर संकट येऊ शकते, असा संदेश या देखाव्यातून देण्यात आला. हा देखावा साकारण्यासाठी १५ दिवस लागले. क्लेचे विद्यार्थी, कागदी पुठ्ठे आणि आकर्षक लाईटिंगचा वापर करून तो सजवण्यात आला.

उत्कृष्ट सादरीकरण
गोरुले परिवाराने इंग्रजी आणि हिंदीला प्राधान्य दिल्या जाणाऱ्या शाळांचे वास्तवही अधोरेखित केले. मराठी माणूसही सार्वजनिक ठिकाणी व शासकीय कार्यालयांत हिंदी–इंग्रजीला प्राधान्य देतो. मुलांनाही तसेच शिकवतो, हे त्यांनी दाखवले. त्यासोबतच मराठी परंपरा, संस्कृती, मुळाक्षरे, सुविचार, भजन-कीर्तन, अभंग–ओव्या तसेच अहिराणी, वऱ्हाडी, खान्देशी, मराठवाडी, आगरी, कोकणी, मालवणी अशा उपभाषांचा देखील या सादरीकरणात समावेश होता.

अंबरनाथ : मराठी भाषेची उपेक्षा देखाव्यातून अधोरेखित केली आहे.