कलागणेश महोत्सवात रसिकांचा जल्लोष
संगीत, नृत्य, चित्रकला आणि शिल्पकलेचा मेळ
वाशी, ता. ४ (बातमीदार) : नवी मुंबई महापालिकेच्या वतीने राज्यस्तरीय महोत्सवांमध्ये आयोजित करण्यात आलेला कलागणेश महोत्सव विष्णुदास भावे नाट्यगृहात रसिकांच्या लक्षवेधी उपस्‍थितीमध्ये उत्साहात पार पडला. मुख्यमंत्री महोदयांच्या संकल्पनेतून महाराष्ट्र शासनाने गणेशोत्सव राज्य महोत्सव म्हणून साजरा करण्याचे जाहीर केले असून, आयुक्त डॉ. कैलास शिंदे यांच्या मार्गदर्शनाखाली हा भव्य उपक्रम राबवण्यात आला.
महोत्सवाचा शुभारंभ वनमंत्री गणेश नाईक, आमदार मंदा म्हात्रे, महापालिका आयुक्त डॉ. कैलास शिंदे, अतिरिक्त आयुक्त सुनील पवार, शहर अभियंता शिरीष आरदवाड यांच्या हस्ते श्रीगणेश प्रतिमा पूजन व दीपप्रज्वलनाने झाला. यानंतर ‘सारेगमप’ फेम सुप्रसिद्ध गायक प्रथमेश लघाटे आणि मुग्धा वैशंपायन यांनी सुरेल गणेशगीत आणि भक्तिगीतांनी सभागृह भारावून टाकले. निवेदनाची जबाबदारी विघ्नेश जोशी यांनी पार पाडली. कार्यक्रमाचे आणखी वैशिष्ट्य म्हणजे रंगमंचावरच थेट कला साकारण्यात आली. चित्रकार सागर जाधव यांनी कॅनव्हासवर श्रीगणेश प्रतिमा रेखाटली, तर शिल्पकार अथर्व मोरे यांनी शाडूच्या मातीची गणेशमूर्ती तयार केली. या कलाकृतींचा स्वीकार आयुक्त डॉ. कैलास शिंदे आणि अतिरिक्त आयुक्त सुनील पवार यांनी करून कलाकारांना प्रोत्साहन दिले. महोत्सवात सुलेखनकार आशीष तांबे यांनी ‘अक्षरगणेश’ या नावाने नऊ गणेश प्रतिमा उभी करून रसिकांचे मन जिंकले.
सामाजिक सहभागात विद्यार्थ्यांचा विशेष वाटा होता. नवी मुंबई महापालिकेच्या शाळा क्रमांक ९२ कुकशेत, ४६ गोठीवली, ९४ कोपरखैरणे येथील विद्यार्थ्यांनी नृत्यप्रस्तुती सादर करून सभागृह दणाणून गेले. शिवकन्या मंगळागौर समूहाने पारंपरिक नृत्यसादरीकरण करून वातावरण अधिक रंगतदार केले.
..............
पाच वर्षांत २५० कोटी वृक्षारोपण
कार्यक्रमाच्या शेवटी मान्यवरांनी महोत्सवाचे महत्त्व अधोरेखित केले. मंत्री गणेश नाईक यांनी पर्यावरणपूरक पद्धतीने गणेशोत्सव साजरा करण्याचे आवाहन करत पुढील पाच वर्षांत २५० कोटी वृक्षारोपण करण्याचा संकल्प सांगितला. आमदार मंदा म्हात्रे यांनी घरगुती गणेशमूर्ती विसर्जन कृत्रिम तलावात करण्याचे आवाहन केले. महापालिका आयुक्त डॉ. कैलास शिंदे यांनी राज्य महोत्सव म्हणून गणेशोत्सव यशस्वीपणे आयोजित झाल्याचे सांगितले आणि सहा फुटांपेक्षा कमी उंचीच्या गणेशमूर्ती कृत्रिम तलावात विसर्जित करण्यासाठी १४३ तलाव उभारल्याची माहिती दिली.