कल्याणमध्ये ओबीसी समाजाचे साखळी उपोषण
कल्याण, ता. ४ (वार्ताहर) : मराठा समाजाला ओबीसी संवर्गात समाविष्ट करू नये आणि सरसकट कुणबी प्रमाणपत्र देऊ नये, या मागण्यांसाठी कल्याणमधील ओबीसी समाजाने आक्रमक भूमिका घेत तहसीलदार कार्यालयासमोर साखळी उपोषण सुरू केले आहे. या आंदोलनात विश्वनाथ जाधव, चंद्रकांत ठाणकर, सुंदर डांगे, डॉ. सुदेश कापरे, भाऊसाहेब पितांबरे, प्रशांत माळी, शनी अंबारे, शत्रुघ्न भोईर, गणेश पाटील यांच्यासह अनेक कार्यकर्ते सहभागी झाले आहेत.

सरकारच्या नवीन जीआरमुळे आता ओबीसी समाज जागा झाला असून, राज्यात सर्वत्र आंदोलन करत आहे. नवीन जीआरमुळे मूळ ओबीसींच्या हक्कांवर गदा येईल. त्यामुळे कुणबी प्रमाणपत्र देणे आणि ओबीसीमधून सरसकट आरक्षण देणे थांबवावे अन्यथा गणपतीच्या सणात मराठा समाजाने हैदोस घातला, मात्र आता गणपतीनंतर नवरात्री येणार आहे, या नवरात्रीत ओबीसी समाजही रस्त्यावर उतरून हैदोस घालणार, असा इशारा ओबीसी समाजाने सरकारला दिला आहे. कल्याण शहरातही उपोषणकर्त्यांनी सरकारविरोधात घोषणा देत तीव्र नाराजी व्यक्त केली.