पनवेलमध्ये रंगणार इंडियन स्कूल एक्सलन्स अवॉर्ड
१३ सप्टेंबरला पुरस्कार वितरण समारंभ
सकाळ वृत्तसेवा
पनवेल, ता. ४ : शिक्षण क्षेत्रातील सातत्यपूर्ण गुणवत्ता, नवकल्पना आणि समावेशकतेची दखल घेऊन शाळांचा गौरव करण्यासाठी पनवेलमध्ये ‘इंडियन स्कूल एक्सलन्स अवॉर्ड – २०२५’ हा सोहळा होणार आहे.
१३ सप्टेंबर रोजी, शनिवार, सकाळी ११ वाजता वासुदेव बाळवंत फडके नाट्यगृहात कार्यक्रम पार पडणार आहे. डॉ. सर्वपल्ली राधाकृष्णन यांच्या जयंतीनिमित्त शिक्षकदिनाचे औचित्य साधून तन्मय पब्लिकेशन आणि सप्तरंग फाउंडेशनच्या सहकार्याने या कार्यक्रमाचे आयोजन करण्यात आले आहे. सकाळ हे माध्यम प्रायोजक असणार आहेत. चंदूकाका ज्वेलर्स यांचे विशेष सहकार्य लाभले आहे. शाळांच्या उल्लेखनीय कामगिरीचे मानांकन करीत त्यांना सन्मानित करण्याबरोबरच, शिक्षणातील उत्कृष्ट पद्धती इतर शाळांसाठी प्रेरणादायी ठराव्यात, हा या कार्यक्रमामागील प्रमुख उद्देश आहे. या कार्यक्रमाला राष्ट्रपती पुरस्कार विजेते दत्तात्रय वारे यांचे प्रमुख मार्गदर्शन लाभणार असून, शिक्षणतज्ज्ञ, शाळांचे प्रमुख प्रतिनिधी, प्राध्यापक व विद्यार्थी मोठ्या संख्येने सहभागी होणार आहेत. ‘इंडियन स्कूल एक्सलन्स अवॉर्ड’ हा शिक्षणातील नवे अधिष्ठान देणाऱ्या घटकांसाठी प्रेरणादायी दीपस्तंभ ठरणार आहे. या सोहळ्यामध्ये शाळांतर्फे विविध उपक्रम, प्रेरणादायी भाषणे व अनुभवकथन आदी कार्यक्रम होणार आहेत. शिक्षण क्षेत्रातील तेजस्वी कार्याचा उत्सव साजरा करण्यासाठी व प्रेरणादायी क्षणांचा लाभ घेण्यासाठी सर्वांना या भव्य सोहळ्यास उपस्थित राहण्याचे आयोजकांतर्फे आवाहन करण्यात येत आहे.