अनैतिक संबंधाच्या संशयातून भावावर प्राणघातक हल्ला

रोहा, ता. ४ (बातमीदार) : पत्नीसोबत अनैतिक संबंधाच्या संशयातून आपल्या सख्ख्या भावावर लोखंडी सळईने प्राणघातक हल्ला केल्याची घटना मंगळवारी (ता. २) महादेववाडी गावात घडली. या हल्ल्यानंतर आरोपी भावाने घटनास्थळावरून पळ काढला; मात्र पोलिसांनी मध्यरात्री त्याला बेड्या ठोकल्या. महादेववाडी गावातील सर्व ग्रामस्थ मंगळवारी सायंकाळी गणपती विसर्जनासाठी विसर्जन घाटावर गेले असताना कारविणे गावातील शिद कुटुंब गणेशोत्सवासाठी महादेववाडी या मूळ गावात आले होते. या वेळी शिद कुटुंबातील सदस्यदेखील गणपती विसर्जनासाठी नदीकाठी गेले असता आरोपी लहू गुणाजी शिद याने या संधीचा फायदा घेत आपल्या पत्नीसोबत भावाचे अनैतिक संबंध असल्याचा संशय घेत रमेशवर लोखंडी सळईने डोक्यात वार करून जीवघेणा हल्ला केला. यामध्‍ये रमेश रक्ताच्या थारोळ्यात पडल्याने आरोपी लहूने घटनास्थळावरून पळ काढला. या घटनेची माहिती मिळताच गावकऱ्यांनी घटनास्थळी धाव घेत जखमी रमेशला रुग्णालयात दाखल केले. त्यानंतर पोलिसांनी घटनास्थळी धाव घेत आरोपी लहूची शोधमोहीम सुरू केली. मध्यरात्री साडेतीन वाजण्याच्या सुमारास लहूला ताब्यात घेऊन पोलिसांनी त्याच्याविरोधात गुन्हा दाखल केला आहे.