वसई, ता. ४ (बातमीदार) : महाराष्ट्राच्या संस्कृतीला गोडवा आहे. जुन्या चालीरीती, परंपरा नवीन पिढीदेखील उत्साहाने जपत आहे. अशातच अमेरिकेत राहणाऱ्या तीनवर्षीय चिमुकलीला महाराष्ट्राच्या संस्कृतीचा लळा लागला आहे. सध्या सुरू असलेल्या गणेशोत्सवात ती विरारमध्ये आली आहे व गणरायाची भक्ती, आराधना करण्यात तल्लीन झाली आहे.
विरार येथे सुधीर गवाणकर आणि सुषमा हे दाम्पत्य राहते. त्यांचा मुलगा सोहम आणि सून अनुजा हे अमेरिकेत कामानिमित्त वास्तव्याला आहेत. त्याठिकाणी त्यांचा व्यवसाय आहे. त्यांची मुलगी अथा गणपती, नवरात्र, दिवाळी यासह अनेक सणांचा आनंद घेत आहे. तिला श्लोक, मंत्र, आरतीदेखील गाता येतात. इतकेच नव्हे तर अमेरिकेत सण साजरे करताना इवलीशी अथा नऊवारी साडी परिधान करीत सणाचा आनंद लुटते. विशेष म्हणजे ती विरारमध्ये जे कोणी नातेवाईक व अन्य मंडळी भेटतात, त्यांच्याशी मराठी बोलण्यास सुरुवात करते.
सध्या ती मुंबई, पालघर व आजूबाजूच्या परिसरात असलेल्या गणेशमूर्तींचे दर्शन घेण्यास आई व कुटुंबीयांसोबत व्यग्र झाली आहे. मराठी खाद्यपदार्थांचा आस्वाद आणि भक्ती असा दुहेरी आनंद घेत आहे. मराठी भाषेला अभिजात दर्जा मिळाला आहे. त्यामुळे प्रत्येक मराठी मान गर्वाने उंचावली आहे, तर दुसरीकडे अमेरिकेत राहूनदेखील चिमुकली आपले संस्कार, परंपरा आणि संस्कृतीचा आदर करून पिढीसमोर आदर्श निर्माण करीत असल्याचे तिचे कौतुक केले जात आहे.
अमेरिकेतही मराठीचा अभिमान
दुसऱ्या देशात असल्यावर त्या ठिकाणची भाषा बोलावी लागते किंवा इंग्रजीचा वापर केला जातो; मात्र अथा मराठीतच संवाद साधते. लहानपणापासून मराठीचे बाळकडू तिला आई-वडिलांनी पाजले असल्याने घरी ती मराठीतूनच सारे काही सांगते. त्यामुळे जरी परदेशात गेलो असलो तरी आपण महाराष्ट्रात आहोत, याचा अभिमान तिच्यामुळे वाटतो, असे तिचे पालक सांगतात.
अमेरिकेतदेखील बोलताना अथा मराठीचा अधिक वापर करते. विरारमधील गणपतींचे दर्शन घेण्यासाठी फिरताना ती स्पष्ट मराठीत बोलते, याचे अनेकांना कौतुक वाटते. आपण कुठेही राहिलो तरी आपली संस्कृती, संस्कारांना विसरू नये. अमेरिकेतदेखील आम्हाला दुसऱ्या देशात आलोय, हे अथामुळे जाणवत नाही.
- अनुजा गवाणकर, अथाची आई
गणपतीचे दर्शन घेण्यासाठी अथा ही तीन वर्षांची चिमुकली आमच्या घरी आली. तिला मराठीमध्ये बोलताना पाहून वाटलेच नाही, की ती अमेरिकेत राहते. भारतीय संस्कृती, संस्कार परदेशामध्ये राहून अनेक जण विसरले नाहीत, हे आपल्या महाराष्ट्राचे भाग्य आहे.
- राजीव पाटील, माजी महापौर
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.