धावत्या लोकलमधून विटावा खाडीत पडला तरुण

ठाणे /कळवा, ता. ४ (बातमीदार) : कळव्यात रेल्वे लोकलच्या दरवाजात उभे राहून प्रवास करणाऱ्या आकाश शर्मा (१९) या तरुणाचा तोल जाऊन तो धावत्या लोकलमधून विटावा खाडीमध्ये पडल्याची घटना गुरुवारी (ता. ४) दुपारी १ वाजण्याच्या सुमारास घडली. या तरुणाचा स्थानिक मच्छीमारांच्या बोटीच्या सहाय्याने शोध घेतला जात असून, अद्याप तो मिळून आला नाही.
कळवा, घोलाई नगर येथे राहणारा आकाश हा मुलुंड येथून लोकलने घरी निघाला होता. याचदरम्यान तो खाडीत पडला. या घटनेची माहिती मिळताच घटनास्थळी आपत्ती व्यवस्थापन कक्षाचे कर्मचारी, अग्निशमन दलाचे जवान, ठाणे आपत्ती प्रतिसाद दलाचे जवान यांच्या मदतीने स्थानिक मच्छीमारांच्या दोन बोटींच्या सहाय्याने शोधमोहीम हाती घेण्यात आली, पण तो मिळून आला नसल्याची माहिती ठाणे आपत्ती व्यवस्थापन विभागाच्या प्रमुख यासीन तडवी यांनी दिली.