कारखाली चिरडल्याप्रकरणी दोघांना अटक
सकाळ वृत्तसेवा
ठाणे, ता. ४ : जुन्या वादातून विठ्ठल गायकर या तरुणाला कारखाली चिरडल्याप्रकरणी श्रीनगर पोलिसांनी गुरुवारी (ता. ४) महेश आणि अमित पवार या भावांना जेरबंद केले आहे, तर मुख्य आरोपी संतोष पवार आणि महेश पाटील हे दोघे पसार असून, त्यांचा शोध सुरू आहे. तसेच अटकेतील दोघांना ठाणे न्यायालयात हजर केल्यावर न्यायालयाने त्यांना येत्या १० सप्टेंबरपर्यंत पोलिस कोठडीत ठेवण्याचे आदेश दिल्याची माहिती श्रीनगर पोलिसांनी दिली.
चहा पिण्यासाठी गेले असताना, जुन्या भांडणातून एका गटामधील चौघांनी दुसऱ्या गटातील वसंत टोकरे आणि बाबू बरफ या दोघांना शिवीगाळ करून मारहाण केली. याचदरम्यान आरोपी संतोष पवार याने भरधाल कार विठ्ठल गायकर यांच्या अंगावर घातली. तसेच ही कार मागेपुढे करत त्यांना चिरडले. विठ्ठल यांना वाचविण्यासाठी गेलेल्या तक्रारदार शंकर वरठे यालाही गाडीने उडवले. दरम्यान, कारखाली चिरडून गंभीररीत्या जखमी झालेल्या विठ्ठल गायकर यांचा मृत्यू झाला असून, तक्रारदार वरठे हे जखमी झाले आहेत. याप्रकरणी गुन्हा दाखल झाल्यानंतर पोलिसांनी दोघांना अटक केली. तसेच या गुन्ह्यातील कार जप्त करण्यात आल्याची माहिती श्रीनगर पोलिसांनी दिली. याप्रकरणी पुढील तपास वरिष्ठ पोलिस निरीक्षक गुलझारीलाल फडतरे यांच्या मार्गदर्शनाखाली सुरू आहे.