हमीद दाभोलकरांची भीती वाजवी!
खटले गोव्यातून महाराष्ट्रात वर्ग करण्यास परवानगी
सकाळ वृत्तसेवा
मुंबई, ता. ४ ः अंधश्रद्धा निर्मूलन समितीचे संस्थापक नरेंद्र दाभोलकरांचे पुत्र हमीद दाभोलकरांसह काही पत्रकारांनी सनातन संस्थेकडून जीवाला धोका असल्याची व्यक्त केलेली भीती वाजवी आणि खरी असल्याचे निरीक्षण उच्च न्यायालयाने नुकतेच नोंदवले. तसेच उजव्या विचारसरणीच्या गटाने त्यांच्याविरुद्ध दाखल केलेले मानहानीचे खटले गोव्यातील न्यायालयातून महाराष्ट्रात वर्ग करण्यास परवानगी दिली.
सनातन संस्था आणि अर्जदारांमधील शत्रुत्वाचा विचार केल्यास याचिकाकर्त्यांनी व्यक्त केलेली भीती वाजवी आणि खरी असल्याचे न्या. निजामुद्दीन जमादार यांनी आदेशात नमूद केले आहे. तसेच गोव्यातील न्यायालयातून महाराष्ट्रातील न्यायालयात खटले वर्ग केल्यास अधिक चांगले होईल, असे स्पष्ट करून न्यायालयाने सर्व खटले कोल्हापूर येथील न्यायालयात वर्ग करण्याचे आदेश खंडपीठाने दिले. तथापि, संस्थेच्या विनंतीवरून न्यायालयाने सहा आठवड्यांसाठी आपल्या आदेशाच्या अंमलबजावणीला स्थगिती दिली. तथापि, दाभोलकर हत्येप्रकरणी दोघांना दोषी ठरवण्यात आले असून सनातन संस्था आणि इतर संघटनांनी दाभोलकरांच्या अंधश्रद्धेविरुद्धच्या कारवायांना तीव्र विरोध केला होता, असेही सत्र न्यायालयाने आपल्या निकालात म्हटल्याचेही न्यायालयाने नमूद केले.
---
नेमके प्रकरण काय?
सनातन संस्थेविरोधात २०१७ आणि २०१८ मध्ये खोटी आणि बदनामीकारक विधाने करण्यात आली. त्यामुळे संस्थेची प्रतिष्ठा मलिन झाल्याचा आरोप करीत गोव्यातील फोंडा येथील न्यायालयात हमीद दाभोलकरांसह अनेक पत्रकारांविरुद्ध मानहानीचे खटले दाखल केले होते. गोव्यात सनातन संस्थेचे मुख्यालय आणि त्यांचा दबदबा आहे. त्यामुळे हे खटले फोंडा न्यायालयातून महाराष्ट्रात कोणत्याही न्यायालयात हस्तांतरित करण्याची मागणी दाभोलकर आणि याचिकाकर्त्या पत्रकारांनी केली होती.