वज्रेश्वरी, ता. ५ (बातमीदार) : भिवंडी तालुक्यातील २० गावांमधून जाणाऱ्या खावडा टॉवर लाईन कामामुळे शेतकऱ्यांचे मोठ्या प्रमाणात नुकसान होत आहे. अद्याप त्यांना योग्य ती नुकसानभरपाई मिळालेली नाही. काही ठिकाणी कंपनीने जबरदस्तीने काम सुरू केले आहे. त्यामुळे शेतकरी संतप्त झाले आहेत.
शेतकऱ्यांचे पिकांचे व शेतीचे नुकसान झाले असून, मोबदला न मिळाल्याने त्यांचा रोष अधिकच वाढला आहे. अलीकडेच प्रांत अधिकारी कार्यालयात शेतकरी आणि कंपनी यांच्यात बैठक झाली होती. त्या वेळी प्रांत अधिकाऱ्यांनी कंपनीला स्पष्ट आदेश दिले होते की, मोबदला निश्चित होईपर्यंत शेतकऱ्यांच्या जमिनीत कोणतेही काम करता कामा नये. तरीदेखील कंपनीने आदेश झुगारून काही गावांमध्ये मोजणी सुरू करण्यासाठी नोटिसा बजावल्या आहेत.
विशेषतः चाने गावातील शेतकऱ्यांना अशा नोटिसा मिळाल्याने ग्रामस्थ आक्रमक झाले आहेत. शेतकऱ्यांनी एकमुखी भूमिका घेतली असून, जोपर्यंत नुकसानभरपाईचा योग्य भाव ठरत नाही, तोपर्यंत कोणत्याही प्रकारची मोजणी करून देणार नाही, असा ठाम पवित्रा त्यांनी घेतला आहे.