चित्रनगरीत ‘फिल्म स्टडी सर्कल’ उपक्रम!
मुंबई, ता. ४ : दर्जेदार चित्रपट बघणारा प्रेक्षकवर्ग निर्माण व्हावा तसेच गाजलेल्या जुन्या चित्रपटांचा आस्वाद सिनेरसिकांना घेता यावा, याकरिता आगामी काळात दादासाहेब फाळके चित्रनगरीच्या माध्यमातून ‘फिल्म स्टडी सर्कल’ हा उपक्रम राबविणार असल्याची घोषणा सांस्कृतिक कार्यमंत्री ॲड. आशीष शेलार यांनी बुधवारी केली. चित्रनगरीतील गणेशदर्शनाला आले असता त्यांनी ही घोषणा केली. या उपक्रमामुळे दर्जेदार चित्रपट बघणारा प्रेक्षकवर्ग निर्माण होईलच, मात्र या उपक्रमाच्या माध्यमातून सिनेरसिकांना जुने दर्जेदार मराठी चित्रपट मोठ्या पडद्यावरती बघण्याची पर्वणीच मिळणार आहे. सह्याद्री वाहिनीवर दर्जदार मराठी चित्रपट प्रसारित करण्याचा उपक्रमदेखील सुरू करण्यात येणार आहे. या उपक्रमामुळे मराठी सिनेसृष्टीला प्रोत्साहन मिळेल, अशी भावना त्यांनी व्यक्त केली.