पटसंख्येच्या आधारावर आश्रमशाळांमध्ये अतिरिक्त तासिका

शिक्षकांच्या भरतीसाठी आदिवासी विकास मंत्र्यांचे आदेश

मुंबई, ता. ४ : आदिवासी शासकीय आश्रमशाळांमधील विद्यार्थ्यांना दर्जेदार शिक्षण मिळावे, तसेच त्यांचे शैक्षणिक नुकसान होऊ नये यासाठी प्रत्येक शाळेत विद्यार्थी पटसंख्येच्या आधारावर अतिरिक्त तासिका घेण्याबाबत वेळापत्रक तयार करण्याचे निर्देश आदिवासी विकास मंत्री डॉ. अशोक उईके यांनी आश्रमशाळांच्या मुख्याध्यापकांना दिले.
आश्रमशाळांमध्ये मोठ्या प्रमाणावर शिक्षकांची पदे रिक्त असल्याने विद्यार्थ्यांच्या शिक्षणावर त्याचा परिणाम होत होता. या पार्श्वभूमीवर शासनाने बाह्यस्रोत पद्धतीचा अवलंब करून शिक्षकांची तत्काळ नियुक्ती करण्याचा निर्णय घेतला आहे. बाह्यस्रोताद्वारे नियुक्त शिक्षकांनी संबंधित आश्रमशाळेत तातडीने कार्यभार स्वीकारणे आवश्यक आहे. ज्या शिक्षकांनी आपला कार्यभार स्वीकारला नाही, त्यांनी आवश्यक ती कार्यवाही करावी, असेही आदेश डॉ. उईके यांनी दिले आहेत. डॉ. उईके यांच्या अध्यक्षतेखाली आश्रमशाळांमधील शिक्षक भरतीसंदर्भात बैठक मंत्रालयात घेण्यात आली. त्या वेळी ते बोलत होते. या बैठकीस आदिवासी विकास विभागाचे सचिव विजय वाघमारे, आदिवासी विकास विभागाच्या आयुक्त लीना बनसोड आदी उपस्थित होते.