आईने पब्जी खेळण्यास रोखल्याने मुलाचे पलायन

भिवंडी, ता. ४ (वार्ताहर) : मोबाईलवर पब्जी गेम खेळत असताना आईने ओरडत मुलाच्या हातून मोबाईल हिसकावल्याच्या रागातून मुलाने घर सोडल्याची घटना भिवंडीत घडली. याप्रकरणी मुलाच्या आईने मुलाच्या अपहरणाबाबत अज्ञात इसमाविरोधात शहर पोलिस ठाण्यात बुधवारी (ता. ३) तक्रार दाखल केली आहे. अरबाज अब्दुल अन्सारी (वय १५) असे या मुलाचे नाव असून, तो मंगळवारी सायंकाळच्या सुमारास मोबाईलवर पब्जी गेम खेळत होता. या वेळी त्याच्या आईने त्याला रागाने पब्जी गेम खेळण्यावरून ओरडत त्याच्या हातून मोबाईल हिसकावला. या रागातून तो घराबाहेर निघून गेला. घरातून निघताना आईने कुठे चालला, असे विचारले असता बाहेर जाऊन येतो, असे अरबाजने सांगितले. मात्र तो घरी परतलाच नाही. अखेर अरबाजची आई रेहानाबानू अब्दुल अन्सारी हिने शहर पोलिस ठाण्यात अज्ञात इसमाविरोधात मुलाच्या अपहरणाबद्दल तक्रार दाखल केली.